Zbulim në ujërat e Vlorës: Arkeologët gjejnë rrënojat e një kështjelle dhe një porti
Një ekip i udhëhequr nga arkeologë të Universitetit të Southamptoin kanë gjetur rrënojat e pazbuluara të një kështjelle dhe një porti në afërsi të Vlorës në Shqipëri, duke e bërë atë një vend shumë më të rëndësishëm nga sa ishte menduar fillimisht, shkruan gazeta angleze ‘Daily Echo’.
Ekipi i akademikëve po realizonte kërkime në zonën arkeologjike të Triportit në gjirin e Vlorës dhe zhytësit zbuluan një shtesë prej tetë akrash të një strukture të përmbytur, duke iu shtuar kështu rrënojave aktuale prej 12 akrash.
Sipas zbulimit mendohet se Triporti ka qenë një vendbanim i madh gjatë periudhës romake dhe mund të ketë pasur lidhje me qytetin e vjetër të Aulonës, Vlora e sotme.
Triporti u ofronte anijeve ankorim të sigurt dhe ishte i lidhur me qytetet e lashta përmes rrugëve kryesore Romake. Kjo zonë u eksplorua fillimisht në shekullin XX dhe me studime të mëtejshme ne vitin 2000.
Gjatë këtij projekti janë zbuluar spiranca më përbërje guri apo hekuri, amfora etj. Objekte të tjera të lashta të gjetura përfshijnë tjegulla për shtëpitë, pllaka, dhe kana uji.
