Rikualifikimi i zonës së Selitës, Veliaj: Do përfitojnë 6 mijë banorë
Bashkia e Tiranës ka nisur projektin për rikualifikimin e plotë urban të bllokut të banimit në zonën e Selitës. Kryebashkiaku Erion Veliaj, që inspektoi punimet së bashku me deputetin e zonës Pandeli Majko, tha se nga projekti i ri do të përfitojnë 6 mijë banorë që kishin ngritur shqetësimet e tyre për problemet urbane e që shumë shpejt do të kenë një infrastrukturë të ngjashme me zonat e urbanizuara të Tiranës.
“Ky investim do të ndikojë në jetën e rreth 6.000 banorëve në këtë zonë. Dua të falenderoj shumë qytetarët që janë treguar dashamirës ndaj projektit të bashkisë, që janë shprehur bashkëpunues për të tërhequr avllitë, për të sistemuar muret, për të kthyer trotuaret e hapësirën publike dhe i ftoj të gjithë të tjerët të bëjnë të njëjtën gjë, për të kuptuar se sakrifikimi i gjysmë metri nga avllia jote apo kopshti yt, në fakt shumëfishohet si investim së pari për vetë shtëpinë tënde, të cilës i rritet vlera dhe së dyti, për të gjithë komunitetin”, tha Veliaj.
Projekti i rikualifikimit të kësaj zone përfshin një sipërfaqe prej 6.9 hektarë dhe parashikohet rikonstruksioni i të gjithë rrugëve brenda bllokut, shtrimi i rrjetit të kanalizimit të ujërave të bardha dhe të zeza, ndërtimi i 750 metër linear mure rrethues, gjelbërim, gjithë ndriçimin, sistemimin e kabllove elektro-telefonikë etj.
