Maqedoni, liderët e partive politike takim për kushtet e zgjedhjeve
Liderët e katër partive më të mëdha në Maqedoni, në pajtim me marrëveshjen politike të arritur më 20 korrik të këtij vitit, pasditen e sotme në Klubin e deputetëve në Shkup filluan takimin në të cilin duhet të vlerësojnë nëse janë përmbushur kushtet për mbajtjen e zgjedhjeve korrekte dhe demokratike të dakorduara më herët për me datë 11 dhjetor 2016, raporton Anadolu Agency (AA).
Lideri i VMRO-DPMNE-së, Nikolla Gruevski, i cili u largua më herët nga takimi deklaroi se partia e tij pranon propozimin e partisë maqedonase opozitare, LSDM-së, për emërimin e kryeredaktorit në televizionin publik të Maqedonisë. Mirëpo, sipas tij, ky propozim i opozitës maqedonase dëshmon se partisë i mungon vullneti për zgjidhjen e krizës politike, sepse siç tha ai, ky person i sugjeruar për kryeredaktor është përcaktuar politikisht.
Gruevski theksoi se ka pranuar çdo propozim që të mbahen zgjedhje të parakohshme parlamentare në datën e dakorduar dhe se tani mbetet të dakordohen tre partitë tjera politike të cilat duhet të kompletojnë trupin ad-hok. Ai lëshoi tryezën e bisedimeve dhe tha se do të kthehet vetëm për të nënshkruar nëse partitë e tjera arrijnë marrëveshje.
Në takim marrin pjesë lideri i BDI-së, Ali Ahmeti, i PDSH-së Menduh Thaçi, i VMRO-DPMNE-së Nikola Gruevski, ai i LSDM-së, Zoran Zaev, si dhe ndërmjetësuesit e Marrëveshjes së Përzhinos, ambasadori i SHBA-së Jess Baily dhe një përfaqësues i Delegacionit të BE-së në Maqedoni.
Nëse liderët e katër partive më të mëdha politike dakordohen, zgjedhjet duhet të mbahen më 11 dhjetor, ndërsa 100 ditë para zgjedhjeve duhet të zgjidhet qeveria kalimtare në të cilën do të marrë pjesë opozita.
Në qeverinë kalimtare opozita duhet t’i fitojë pozitat në sektorët e punëve të brendshme dhe për punë dhe politikë sociale, si dhe zëvendësministrave plotësues për financa, shoqëri informatike dhe administratë dhe për bujqësi. 100 ditë para zgjedhjeve opozita duhet të emërojë kryeredaktor dhe përgjegjës të ri në Radio-Televizionin Publik të Maqedonisë, ndërsa sot pritet të kompletohet edhe trupi ad-hok i cili do t’i monitorojë mediat gjatë zgjedhjeve.
Paraprakisht, është pastruar edhe lista zgjedhore e votuesve të cilët kishin të dhëna kontestuese.
