KE: Negociatat me Bashkimin Europian varen nga Vettingu
Ministrja e Integrimit, Klajda Gjosha doli sot në një konferencë të përbashkët me drejtorin për zgjerim në Komisionin Europian, Christian Danielsson.
Zyrtari i KE-së tha se çelja e negociatave midis Shqipërisë dhe Bashkimit Evropian varet nga vendimi i vendeve anëtare të Unionit, duke kujtuar se procesi i Vettingut është pika kryesore.
“Pikë kyçe është zbatimi i ligjit për vettingun. KE e bëri të qartë se cilat janë pritshmëritë nga Shqipëria. Dëshirojmë të shikojmë vazhdimësi të punës për zbatimin e reformave. Do të vazhdojmë të mbështesim të gjitha përpjekjet e Shqipërisë për reformat”, tha drejtori për zgjerimin në KE.
Ndërkohë Gjosha u shpreh se rekomandimi duhet të shërbejë për vazhdimin e dialogut.
Ministrja tha se duhet të shikohet me kujdes dhe t’i kushtohet vëmendje çdo rreshti të raportit.
“Raportin ta konsiderojmë si nxitësin më të mirë për të vazhduar punën e nisur. Dhjetori të shënojë nisjen e një kapitulli të ri për vendin tonë”, tha Gjosha.
