Shpenzimet e komunikimit, shqiptarët 36.7 euro në vit për celularin
Shpenzimi mesatar vjetor i shqiptarëve për komunikimin me celular është 76% më i ulët se mesatarja e Bashkimit Europian.
Sipas llogaritjeve të Autoritetit të Komunikimeve Elektronike dhe Postare, tarifat e shërbimeve celulare kanë rënë me ritme të shpejta gjatë viteve të fundit, çka ju ka mundësuar shqiptarëve të paguajnë gjithnjë e më pak.
Sipas AKEP, në vitin 2015 e ardhura mesatare e operatorëve celularë shqiptarë nga një përdorues ishte 36.7 euro në vit. Për vendet e Bashkimit Europian, e ardhura mesatare vjetore e operatorëve është 156 euro në vit për çdo përdorues, raporton Tv Scan.
Shpenzimi mesatar në Shqipëri është 23% më i ulët krahasuar me vendin e fundit të BE për këtë tregues, që është Letonia, me 47 euro në vit.
Sipas AKEP, ky tregues për Shqipërinë ka rënë me 40% që nga viti 2010, ndërsa në vendet e BE rënia e shpenzimeve në këtë hark kohor është 25%.
Rënia e shpejtë e këtij treguesi është efekt i konkurrencës në rritje, por, edhe i ndërhyrjeve gjithnjë e më aktive të autoritetit rregullator, që në vitet e fundit ka ulur tarifat me shumicë mes operatorëve dhe ka ndaluar diferencimin e tarifave për thirrjet brenda dhe jashtë rrjetit.
