Iraku i përgjigjet Trumpit, ndalon hyrjen e qytetarëve amerikanë në vend
Vendimi është marrë në përgjigje të masave të emigracionit të vendosura nga presidenti i SHBA-së, Donald Trump, që ndalojnë hyrjen në SHBA të qytetarëve të shtatë vendeve me popullsi me shumicë myslimane, ku përfshihet edhe Iraku.
“Iraku është në vijën e frontit në luftën kundër terrorizmit dhe është e padrejtë që irakianët të trajtohen në këtë mënyrë”, thanë parlamentarët e vendit arab në lidhje me masën e re të Uashingtonit.
“Masa e reciprocitetit” e marrë nga Bagdadi kufizon lëshimin e vizave për 90 ditë për amerikanët që kërkojnë të vizitojnë vendin arab.
Mes masave për të reduktuar rrjedhjen e emigrantëve dhe refugjatëve, të dekretuar nga Trump përcakohet se:
Që nga e premtja dhe gjatë 120 ditëve të ardhshme pezullohet programi i pranimit të gjithë refugjatëve.
Hyrja e refugjatëve sirianë pezullohet për kohë të pacaktuar;
Pezullohet për 90 ditë ardhja e emigrantëve nga shtatë vende me shumicë myslimane: Irak, Siri, Iran, Sudan, Libi, Somali dhe Jemen.
Pas kësaj kohe, numri i emigrantëve të pritur do të reduktohet në 50.000 gjatë vitit 2017 (në vend të 110,000 që vendosi të pranojë Barack Obama).
Do të kenë prioritet refugjatët e pakicave fetare të persekutuara në vendet myslimane, veçanërisht të krishterët sirianë.
