Jahjaga ndërhyn vetëm nëse pengohen proceset demokratike

Presidentja e vendit, Atifete Jahjaga, është duke përcjellë procesin e konstituimit të Kuvendit, por nuk e ka në plan t’i thërrasë liderët e partive politike në përpjekje për të tejkaluar bllokadën institucionale.

Por, ka një moment ku Presidenca mund të vihet në veprim. Zyrtarë të saj kanë thënë se do të ndërhyjnë vetëm në rastin kur pengohen proceset demokratike të vendit.

Presidenca vlerëson se deputetët e Kuvendit të Kosovës kanë bërë betimin në seancën e 17 korrikut dhe kanë mandatin e tyre të plotë për të gjetur zgjidhjet për konstituimin e institucionit që përfaqëson qytetarët e vendit.

Arbër Vllahiu, zëdhënës i Atifete Jahjagës, ka deklaruar se ndërhyrja në institucionin e pavarur, siç është Kuvendi, do të shënonte shkelje të parimeve të demokracisë parlamentare.