Bota

Kim Dotcom mund të ekstradohet në SHBA

Një gjykatë në Zelandën e Re vendosi të hënën që sipërmarrësi i internetit Kim Dotcom mund të ekstradohet në SHBA, për tu përballur atje me akuzat lidhur me uebsajtin e tij Megaupload, që u mbyll në vitin 2012 pas një operacioni të urdhëruar nga FBI-ja.

Gjykata e Lartë e Oklandit miratoi vendimin e një gjykate më të ulët në vitin 2015 mbi 13 akuza, përfshirë edhe atë të konspiracionit për ryshfet, shkelje të të drejtës së autorësisë, larje parash dhe mashtrim, edhe pse e cilësoi vendimin me defekte në disa pika.

Autoritetet amerikane thonë se Dotcom dhe tre bashkëpunëtorë të tij në Megaupload, i kanë shkaktuar studiove të filmave dhe kompanive të regjistrimit më shumë se 500 milionë dollarë dëme dhe kanë gjeneruar më shumë se 175 milionë dollarë, duke inkurajuar përdoruesit e internetit me pagesë të mbledhin dhe ndajnë materiale që ruhen nga e drejta e autorit.

Avokati i Dotcom tha se vendimi do të apelohej në Gjykatën e Apelit të Zelandës së Re. Dotcom, i lindur në Gjermani dhe me banim në Zelandën e Re, u bë i njohur për stilin luksoz të jetesës si edhe për aftësitë e tij kompjuterike.

Ai postonte foto të tij me makina me targa të rralla si “God” (Zot) apo “Guilty” (fajtor), duke qëlluar me armë apo duke fluturuar përreth botës me avionin e tij privat.

Related Articles

Leave a Reply

Your email address will not be published. Required fields are marked *

Back to top button