UNESCO në Shqipëri, fondet që janë dhënë në dekadën e fundit
Që nga viti 2008, Shqipëria ka përfituar nga programet e UNESCO-s mbi rreth 335,500 dollarë. Të dhënat zyrtare të kësaj organizate mbi Shqipërinë tregojnë se numri më i madh i projekteve të financuara (6 të tilla me vlerë 113,000 USD) kanë qenë në periudhën 2008-2009.
Për periudhën 2016-2017, në total janë miratuar tre projekte, me vlerë rreth 43,000 USD.
Shqipëria është anëtare e UNESCO-s që nga viti 1958 dhe ka disa trashëgimi që janë të mbrojtura prej saj, si: Butrinti, Gjirokastra, Berati dhe Isopolifonia.
Ndërsa janë rreth pesë projekte që janë në listë pritjeje, nga të cilat pritet që të hyjë për miratim gjatë 2017-s Liqeni i Ohrit, pjesa shqiptare. Ndër projekte të tjera janë: qyteti i vjetër i Apolonisë (2014), Amfiteatri i Durrësit (1996), Varret e Selcës (1996), etj.
Shqipëria që nga viti 2010 jep kontribut vullnetar në UNESCO. Këto vlera kanë ndryshuar në gjashtë vitet e fundit. Vlera më e ulët është dhënë në vitin 2011 me 440 dollarë, ndërsa më e larta në vitin 2015 me 66,246 USD. Për vitin 2016 kjo vlerë u llogarit në 26,120 dollarë dhe është paguar tërësisht.
Në total Shqipëria ka ratifikuar 18 instrumente ligjore me këtë organizatë ndërsa 22 janë ende të panënshkruara.
Programet
113,000 USD 2008-2009
100,300 USD 2010-2011
34,000 USD 2012-2013
45,000 USD 2014-2015
43,000 USD 2016-2017
