Home / Intervista / “Unë dhe Saimir Tahiri do t’i japim fitoren PS-së në Tiranë”

“Unë dhe Saimir Tahiri do t’i japim fitoren PS-së në Tiranë”

I ftuar mbrëmjen e kësaj të hëne në “Opinion”, Kryetari i Bashkisë së Tiranës, Erion Veliaj tha se nuk kishte patur dijeni për ndryshimet në qeveri dhe se ky ka qenë një vendim i kryeministrit.

“Ka qenë një vendim ekskluziv i Kryeministrit të vendit, i cili ka përgjegjësinë për të gjithë sukseset dhe vendimet që merr në qeveri. ”

I pyetur nga gazetari Blendi Fevziu, nëse Rama po tenton t’ia bëjë rrugën më të lehtë Kryebashkiakut, duke hequr ata që kanë qenë zëra kontestues ndaj tij si rasti i Tahirit, Veliaj e mohoi një gjë të tillë duke e konsideruar si fantazi.

Madje Kryebashkiaku tha se do të punojë së bashku me Tahirin në Tiranë për zgjedhjet e 18 Qershorit.

Ndër të tjera, Veliaj ka mohuar gjithashtu që të ketë ndonjë ambicie për të qenë kryetar i Partisë Socialiste. Kryebashkiaku tha se është duke shijuar punën në krye të institucionit që drejton dhe nuk ka ndërmend të bëjë një punë tjetër.

Fevziu: A u ‘pre koka’ e Saimir Tahirit për arsye të një rivaliteti me ju që po perceptohej në Partinë Socialiste?

“Besoj që nuk është aspak e vërtetë, Saimir Tahiri ka bërë një punë të shkëlqyer si ministër i Brendshëm, sepse sot Shqipëria ka rend, ka shtet, ka një kontroll territori që nuk e ka pasur më përpara.  Besoj që bashkë me Saimir Tahirin kemi një garë të jashtëzakonshme për zgjedhjet e 18 qershorit”.

Fevziu: Nuk kam parë ndonjë fytyrë më të trishtuar se ajo e zotit Tahiri në kohën që ju po i bënit disa elozhe Ditën e Verës në Pazarin e Ri.

Veliaj: Po abuzoni me truket kinematografike që janë të pavërteta.

Fevziu: Si janë raportet tuaja personale me zotin Tahiri?

Veliaj: Janë të jashtëzakonshme. Ne flasim përditë, kemi të dy një barrë që të koordinojmë punën e PS në Tiranë dhe mezi pres që të dy t’i sjellim fitoren PS në Tiranë.

Fevziu: A ka dy linja të ndryshme brenda në PS, njëra që ju mbështet më shumë ju dhe njëra që shkon në drejtim të kundërt?

Veliaj: Ka një linjë që mbështet Edi Ramën si një kryeministër i cili besoj e ka ndryshuar faqen Shqipërisë.

Veliaj komentoi edhe koalicionin qeverisës mes Partisë Socialiste dhe Lëvizjes Socialiste për Integrim. Sipas tij, e majta e bashkuar ka sjellë gjithmonë stabilitet dhe rritje ekonomike. Veliaj tha se Shqipëria jeton më mirë, se sa jetonte 3 vite e gjysmë më parë.

Duke folur për projektin e Pazarit të Ri, dhe pretendimet e Partisë Demokratike se Bashkia e tanishme vetëm sa ka zbatuar projektin e kohës së Lulzim Bashës, Veliaj tha se “në Tiranë ne gjetëm një Bashki që s’kishte firmosur një kontratë, një bashki që s’kishte vënë asnjë qindarkë kundrejt këtij projekti.”

“Për Pazarin e Ri, shuma e vënë në dispozicion nga bashkia e Lulzim Bashës ka qenë zero. Shqetësimi i fondit ka qenë se ne kemi pasur një partner shumë jo serioz, i cili ka thënë po, po, po, por nuk bën punë, po, po, po, por nuk firmos. Dhe nuk jep financa.”

“Gjëja e parë që kam bërë, duke qenë se edhe kam premtuar në fushatë, duke qenë se edhe kam pasur edhe një lidhje sentimentale me Pazarin e Ri që nga koha kur kam qenë fëmije dhe kam shitur në Pazar të Ri, ishte në fushatë që ne do t’i përgjigjemi kësaj kërkese jo vetëm duke bërë të njëjtin financim por disa fish. Sot Fondi Amerikan ka dhënë mbi 1 milion dollarë, Bashkia e Tiranës ka dhënë mbi 2 milion dollarë, qeveria shqiptare po 2 milion dollarë.”

Veliaj tha se i gjithë projekti, së bashku me investimet në eko-sistemin rreth e rrotull Pazarit të Ri ka shkuar tek 5 milion dollarët.

Kryetari i Bashkisë u pyet nga Fevziu për vdekjen e 17-vjeçarit Ardit Gjoklajt në landfilldin e Sharrës.

Veliaj u shpreh se nuk ka asnjë përgjegjësi në lidhje me vdekjen aksidentale të të riut, ndërsa u shpreh se ka qenë i hapur për çdo hetim rreth kësaj çështjeje.

“Në momentin që flasim, Bashkia e Tiranës, u ka dhënë në dispozicion çdo dokument. Aksidente në kantier të Tiranës kemi gjatë gjithë kohës, nëse disa veta duan ta përdorin politikisht edhe janë në atë fazë, patjetër mund ta përdorin. Në dallim nga Lulzim Basha, unë nuk i bëj bisht as prokurorisë, as gjykatës, as policisë dhe as hetuesisë”, tha Veliaj.

Kujtojmë se trupi i pajetë i 17-vjeçarit, Ardit Gjoklaj, banor i Kombinatit u gjet pasditen e 7 gushtit tek Landfilldi i Sharrës, në grumbullin e mbeturinave. Viktima ishte punonjës sezonal në landfill, i pa regjistruar dhe dyshohet se është aksidentuar për vdekje nga një mjet tip “Eskavator me kova”, gjatë punës.

Fevziu e akuzoi Veliajn se kishte censuruar një emision kundër bashkisë. Bashkiaku tha që nuk është vërtetë, pasi ai emision u transmetua në Opinion që ka shikueshmëri shumë të lartë se televizioni që e kishte në fillim.

Lidhur me këtë temë Veliaj sqaroi dhe pozicicionin e gazetares Alida Tota e cila u fol se humbi vendin e punës si shkak i presionit të kryebashkiakut. Veliaj tha se ajo ka qenë një punonjëse e ministrisë së tij dhe më parë kishte punuar si zëdhënëse e Sali berishës. Veliaj pranoi fajin se e kishte mbajtur në detyrë atë një vit më tepër edhe pse ishte e paaftë.

Leave a Reply

Your email address will not be published.