Rajoni

Tregu i pronës turistike në Bullgari është i qëndrueshëm

Blerësit e pronës së patundshme nuk kanë hequr dorë nga Bullgaria. Për shumicën prej tyre vendi ynë është një rajon i preferuar jo vetëm për pushim, por edhe për qëndrim të përhershëm.

bullgaria

Qindra shtetas nga Rusia, Ukraina, Bjellorusia dhe Kazakistani janë pronarë të shtëpisë së dytë tek ne, kryesisht në bregdet, ku qëndrojnë të paktën 3 muaji për vit, që t’u kënaqen ditëve të ngrohta diellore dhe plasjes së dallgëve. Është e dukshme, që as kriza në Krime, as lajmet për përmbytjet e mëdha në Bullgari, as paqëndrueshmëria politike, janë në gjendje të largojnë ata miq, kaq të respektuar nga biznesi.

Afro 12 për qind ulje të të ardhurve gjatë kësaj vere parashikojnë specialistët në fushën e turizmit. Një nga shkaqet është ulja e çmimeve të pushimeve me afro 10 për qind. Tjetra është ulja e aftësisë blerëse të rusëve, të cilët janë miqtë tradicional të bregdetit bullgar. Pikërisht te ta shihet një tërheqje nga tregu i pronës së patundshme. “Në krahasim me qershorin dhe korrikun e vitit të kaluar, gjatë po këtyre dy muajve të këtij viti, dy herë më pakë shtetas rusë shfaqën interes ndaj banesave në Bullgari” – shpjegon Teofill Petrov, drejtor ekzekutiv i kompanisë investuese, e cila punon në tregun bullgar. Mirëpo, kjo ulje u përballua në sajë të rritjes së kontratave të blerjes me shtetasit e ish republikave sovjetike.

Megjithatë, pse rusët, të cilët gjatë viteve shndërruan komplekse të tëra turistike në territore me prani dominuese ruse, tani dyshojnë të bëjnë investime në blerjen e pronës së patundshme tek ne?

“Në radhë të parë filloi kriza me Ukrainën gjë që provokoi zhvleftësimin e rublës ruse. Kjo u bë shkak, që klientët rusë të përmbahen nga blerja e pronës – shpjegon zoti Petrov. – Një ndikim serioz ushtroi edhe falimentimi i agjencive të mëdha turistike ruse, të cilat i braktisën klientët në mesë të pushimeve të tyre. Pjesa dërmuese e këtyre njerëzve janë pronarë të banesave në Bullgari. Kështu që shumë prej tyre kishin vështirësi të vijnë. Është e vërtetë, se shumë shtetas rusë vijnë në Bullgari me veturat private, por ata janë të detyruar të kalojnë përmes Bjellorusisë dhe Polonisë, gjë që e zgjatë rrugën e tyre. Për shkak të situatës ata nuk mund të kalojnë përmes Ukrainës, nga ku rruga është më e shkurtër.”

Dhe në se rusët kanë dyshim të bëjnë investime, që të blejnë shtëpi të dytë tek ne, çështja me blerësit e tjerë nuk qëndron ashtu. Doli që kohët e fundit po rritet numri i klientëve nga Bjellorusia dhe Kazakistani, që bëhen pronarë të apartamenteve ose shtëpive në Bullgari. Të mos flasim, se gjatë muajve të fundit kontratat me shtetasit e Ukrainës u rritën me 10 për qind. Kjo kategori klientësh nuk është e re për vendin tonë, por është interesante, që nga fillimi i konfliktit ushtarak në Ukrainë, aktiviteti i tyre u rrit. Pse është ashtu?

“Në Bjellorusi dhe Kazakistan që nga viti i kaluar shihet një interes i rritur – shpjegon Teofill Petrov. – Kjo është një tendencë afatgjatë. Ukrainasit kishin mundësi të frekuentojnë pushimoret në Gadishullin Krime deri në fillimin e krizës. Pas zhvillimeve pranverën e tanishme, vajtja e tyre atje është e vështirësuar dhe prandaj ata u orientuan te destinacioni më i afërt për pushim, siç është Bullgaria. Për ukrainasit vendi ynë është i afërt si gjuhë dhe kulturë. Të mos flasim, se është pjesë e BE-së.”

Në qytetin bregdetar Sozopoll, kompania në të cilën punon zoti Teofill Petrov, disponon një kompleks me afro 1000 apartamente. Pothuajse të gjithë janë pronë të klientëve rusishtfolës. Dhe nëse para disa vitesh kryesisht anglezët blinin pronë në pushimoret bullgare, me qëllim investimi dhe fitimi afatshkurtër, vendin e tyre dalëngadalë e zënin rusët, ukrainasit dhe bjellorusët. Ndryshe, se ata njerëz mbërrijnë këtu jo të bëjnë biznes, por të provokuar nga emocionet. “Kemi dy tipa klientësh. Tipi i parë kërkon apartamente ose shtëpi, më shpesh në bregdet, me qëllim vendosjen e përhershme në Bullgari, ku e ndjejnë veten si në shtëpi. Tipi tjetër blejnë pronë, që të vijnë të pushojnë në Bullgarinë diellore”, shpjegon Teofill Petrov.

Pavarësisht nga zhvillimet në Ukrainë, ekspertët janë të mendimit, se tendencat e lartpërmendura në blerjen e pronës së patundshme në pushimoret do të vazhdojnë edhe gjatë vitit 2015. Kështu që mund të pritet një qëndrueshmëri në këtë degë të ekonomisë brenda 12 muajve të ardhshëm. Kështu që për një sektor, i cili ndikohet nga koniunktura e ndryshueshme ekonomike dhe politike, ky është një lajm i mirë.

Related Articles

Leave a Reply

Your email address will not be published. Required fields are marked *

Back to top button