Parashikoi fitoren e Trump, studiuesi francez: Faktori që çon në fitoren e Le Pen
Edhe pse shumica e sondazheve parashikojnë humbjen e Marine Le Pen në raundin e dytë të zgjedhjeve presidenciale në Francë, ndikimi i disa faktorëve që nuk po merren në konsideratë nga sociologët mund të çojë të djathtën në fitore, mendon Serge Galam, fizikani francez që parashikoi fitoren e Donald Trump në zgjedhjet amerikane.
Sipas tij për të vlerësuar siç duhet të dhënat e sondazheve nuk mund të injorohen faktorë kyç, si përqindja e pjesëmarrjes në zgjedhje dhe, më e rëndësishmja, pjesëmarrja e mbështetësve të secilit kandidat.
Sipas disa vlerësimeve, abstenimi i votuesve mund të arrijë në 30%. Galam mendon se ky tregues mund të ketë një ndikim vendimtar në rezultatin e këtyre zgjedhjeve të shënjuara nga një seri skandalesh.
“Zgjedhja e saj sa vjen e bëhet më e mundshme”, tha Galam që është edhe studiues në Qendrën Kombëtare Franceze për Kërkime Shkencore.
“Është një vizion shkencor i situatës: Për të fituar Le Pen i duhet një diferencë pjesëmarrjeje, mes votuesve të saj dhe atyre të rivalëve, rreth 20%”, shpjegon shkencëtari.
Galam konsideron se përfshirja e mbështetësve të rivalëve kryesorë të Le Pen, politikanit të qendrës Emmanuel Macron dhe konservatorit François Fillon, mund të jetë më e ulët se sa pritej në këtë moment vendimtar. Përkundrazi, Marine Le Pen është në një pozicion më të mirë, pasi ndjekësit e saj janë më të motivuar për të votuar.
