Politika

AP: Opozita po pengon reformën

Një sërë mediash ndërkombëtare përcollën apelin e Bashkimit Europian për opozitën shqiptare, që t’i japë fund bojkotit në Parlament e të bëhet pjesë aktive e vazhdimit të punës për reformën në drejtësi, duke e konsideruar të një rëndësie kyçe në përpjekjet e vendit për anëtarësim në bllokun europian.

Washington Post botoi një artikull të Associated Press, ku kujtohet se si reforma në drejtësi u miratua vitin e kaluar, por po pengohet prej largimit të opozitës nga Parlamenti, i cili duhet të krijojë organizmat e vettingut, mekanizmi që do të verifikojë background-in e gjykatësve dhe prokurorëve.

Opozita pretendon se këto institucione mund të jenë subjekt manipulimi. BE-ja thotë se nuk është kjo mënyra për të zgjidhur pakënaqësitë. Debati politik nuk duhet të zhvillohet jashtë, por brenda Parlamentit, në përputhje me praktikat demokratike, ishte deklarata e qartë e shefes së diplomacisë eurpiane, Federica Mogherini, dhe komisionerit për zgjerimin Johannes Hahn, të cilët shprehën keqardhje për bojkotin e opozitës dhe faktin që nuk u regjistrua në zgjedhje.

Të dy ata i drejtuan partive politike apelin të përfundojë krijimin e institucioneve të vettingut, vlerësimit dhe verifikimit të figurës së gjyqtarëve dhe prokurorëve. Duke iu referuar një reference ndaj kritikave të fundit që kryetari i PD, Lulzim Basha i ka bërë reformës në drejtësi, Mogherini dhe Hahn theksuan se “Goditja e reformës në drejtësi, në vend të punës për të siguruar zbatimin e vettingut, nën mbikqyrjen e ngushtë të Operacionit Ndërkombëtar të Monitorimit, dëmton të tashmen dhe të ardhmen e Shqipërisë”.

Basha të mërkurën akuzoi diplomatë të lartë në Tiranë se mbështetin përpjekjet e kryeministrit Edi Rama për të vendosur gjyqësorin nën kontrollin e partisë në pushtet. Edhe pse kreu i PD nuk tha emra, referimi i tij ndaj ambasadores së delegacionit të BE, Romana Vlahutin u kuptua qartë. Shqipëria duhet me çdo kusht të përmirësojë sistemin e korruptuar të drejtësisë përpara se Brukseli të japë dritën jeshile negociatave të anëtarësimit.

Related Articles

Leave a Reply

Your email address will not be published. Required fields are marked *

Back to top button