Durrës, policia jep detaje për vrasjen e dyfishtë dhe plagosjen
Policia e Durrësit ka dhënë detaje në lidhje me ngjarjen e djeshme ku mbetën të vrarë dy persona e u plagos një i tretë. Lulzom Qama, 35 vjeç është konfliktuar me shtetasin Yzedin Shallari 65 vjeç. Dyshohet se shkak është bërë parkimi i një automjeti.
Në këto momente 35-vjeçari ka qëlluar me thikë Yzedin Shallarin. Ndonëse i dëmtuari i dërgua në spital, gjeti vdekjen prej plagës së marrë.
Më pas shtetasi Lulzim Qama ka goditur me thikë edhe shtetasin Eduart Xhaferri, ku ky i fundit ka marrë armën e gjahut tip Shotgan 5, kalibri 12 mm, të cilën e kishte në mjetin e tij dhe ka qëlluar shtetasin Lulzim Qama, nga brenda mjetit të tij tip Nissan. Si pasojë e kësaj, Qama ka gjetur vdekjen e menjëhershme.
Shtetasi Eduart Xhaferri në momentin që është goditur me thikë nga shtetasi Lulzim Qama ka qenë brenda mjetit tip Nissan, ku edhe menjëherë ka marrë armën e gjahut dhe ka goditur shtetasin Lulzim Qama.
Burime policore konfirmojnë se të tre personat e përfshirë mesditën e sotme në konfliktin e përgjakshëm, çdo mëngjes, shkonin në rezervat nga Durrësi në Rrushkull me makinat e punës, ku kryenin detyra specifike, e më pas ktheheshin në shtëpitë e tyre në mbrëmje. Gjatë këqyrjes së vendit të ngjarjes u sekuestruan në cilësinë e provave materiale mjetet e kryerjes së krimit arma e gjahut tip shotgan dhe thika. Materialet i kaluan Prokurorisë Durrës për veprime të mëtejshme për veprën penale”Vrasja me dashje”.
