Politika

Rama do t’i shkarkonte më 26 qershor, por ja ç’thonë ministrat teknikë të Bashës

Ministrat teknikë të PD-së janë akoma në detyrë pavarësisht se gjatë fushatës Rama deklaroi se do t’i hiqte nga detyra sapo të merrte mandatin e dytë, kjo gjë nuk ndodhi.

Të kontaktuar nga “Gazeta Shqiptare” ministrat teknikë deklarojnë se ata janë dekretuar nga Presidenti i Republikës dhe do të respektojnë nenin 106 të Kushtetutës, që do të thotë se do të rrinë deri në mandatimin e qeverisë së re.

Ministrja e Arsimit, Mirela Karabina u shpreh për “GSH”: “Ne jemi në detyrë. Vazhdojmë punën. Jemi dekretuar nga presidenti dhe kaq”. Po në të njëjtin mendim ishte edhe ministrja e Punës dhe Çështjeve Sociale, Xhulieta Kërtusha. “Ne do të zbatojmë Kushtetutën, nenin 106”, – tha ajo.

E pyetur se kjo do të thotë që do të vijojë të qëndrojë në detyrë deri në mandatimin e qeverisë së re, Kërtusha pohoi: “Po, patjetër”. Në nenin 106 të Kushtetutës përcaktohet: “Kryeministri dhe ministrat janë të detyruar të qëndrojnë në detyrë deri në formimin e Këshillit të Ministrave pasardhës”.

Emërimi i 6 ministrave teknikë në qeverinë e drejtuar nga Edi Rama ishte pjesë e marrëveshjes së dakordësuar më 18 maj, mes Ramës e Lulzim Bashës, për të garantuar një proces zgjedhor të ndershëm.

Pikërisht pas propozimeve që kryeministrit Rama i erdhën nga kreu i opozitës Lulzim Basha, emrat u dërguan dhe u dekretuan edhe nga presidenti Bujar Nishani më 22 maj.

Related Articles

Nje koment

  1. Rama do te duket sa i perkushtuar do jete per popullin shqipetar nga ministrat qe do caktoje.Te zbatohet vetingu.

Leave a Reply

Your email address will not be published. Required fields are marked *

Back to top button