Ekonomia

Kompania italiane padit në Gjykatë Bashkinë e Vlorës për moszbardhjen e lejes së ndërtimit

Shoqëria italiane “EUROPA COSTRUZIONI” sh.p.k ka paditur Bashkinë e Vlorës në Gjykatën Administrative për moszbardhje të lejes së ndërtimit miratuar me vendimin nr.5/121, dt.17.08.2010 të Këshillit të Rregullimit të Territorit të Bashkisë.

Lejet e ndërtimit historikisht janë shoqëruar me problematika kryesisht korrupsion në Shqipëri, duke ndikuar për keq klimën e biznesit në Shqipëri. Vendi ynë gjithmonë është renditur për nga fundi për lehtësitë e pajisjes me leje ndërtimi në indeksin e Bankës Botërore “Si të bësh biznes”. Por për të përmirësuar këtë situatë, qeveria shqiptare vitin e kaluar ndryshoi legjislacionin për të mundësuar dhënien e lejeve në mënyrë elektronike.

Por moratoriumi për ndërtimet dhe mungesa e planeve rregulluese në shumë qytete me gjithë ndryshimet në legjislacion duket se i kanë komplikuar edhe më tej investimet në sektor sidomos për individët.

Por teksa bizneset kalojnë të gjithë kalvarin e procedurave dhe arrijnë të marrin miratimet nga Këshilli i Rregullimit të Territorit, praktikat e bllokimit vijojnë duke penguar zbardhjen e lejeve. Raste të tilla janë konstatuar edhe investime serioze në sektorë të energjetikës, ku është parë se ndërtimi i objekteve ka filluar pa u zbardhur leja e ndërtimit.

Këshilli Kombëtar i Territorit, në datë 30 korrik 2015, vendosi që, të gjitha autoritetet vendore të fillojnë procedurat për hartimin e planeve të përgjithshme vendore për territorin përkatës. Ky vendim merr shkas nga nevoja për pajisjen me plane të përgjithshme vendore të unifikuara në kuadrin e ndarjes së re administrativo-territoriale, si dhe nga nevoja për drejtimin e zhvillimit të territorit në ndërkohë.

Deri në miratimin e planeve të përgjithshme vendore, autoritetet vendore lejohen të japin leje ndërtimi vetëm për punime të infrastrukturës; struktura publike; ndërhyrje me karakter emergjent; objekte për interes publik, shtetëror dhe kombëtar, struktura me funksion prodhues, industrial, përfshirë këtu ato me material porositës; struktura me funksion turistik; struktura në funksion të prodhimit, përpunimit dhe distribucionit të produkteve bujqësore dhe blegtorale; banesa individuale/njëfamiljare, kërkuar nga pronari i truallit për strehimin primar të tij me sipërfaqe totale ndërtimi deri në 250 m²; shtesa në banesa individuale/njëfamiljare ekzistuese, deri në masën 50% të sipërfaqes së tyre totale të ndërtimit.

Njësia e Qeverisjes Vendore, pas marrjes së njoftimit nga AKPT dhe informimit të Këshillit Kombëtar të Territorit lidhur me konformitetin e ndërtimit të propozuar me rastet përjashtimore të përmendura më sipër, mund të vijojë me miratimin e kërkesave për leje ndërtimi.

Related Articles

Leave a Reply

Your email address will not be published. Required fields are marked *

Back to top button