Vjedhja në BSH, Arvizu takon Metën: Çështja po politizohet, pengon hetimin
Ndërkohë që ish-guvernatori Fullani pritet të njihet me masën e sigurisë në Gjykatën e Apelit, kryeparlamentari Ilir Meta ka takuar në të njejtën kohë ambasadorin e Shteteve të Bashkuara të Amerikës, Aleksandër Arvizu.
Ky i fundit ka dhënë një mesazh të qartë, për të mos u prekur pavarësia e gjyqësorit, pak para vendimit të gjykatësve të Apelit, të cilët pritet të lirojnë ose mbajnë prapa hekurave ish-Guvernatorin Fullani.
Ambasadori Arvizu shprehu edhe shqetësimin se çështja në fjalë po politizohet nga personat që diskutojnë për të. Diplomati amerikan komentoi për mediat se politizimi i çështjes nuk e ndihmon hetimin, ndërsa apeloi të mos preket integriteti i gjyqësorit si dhe të ruhet stabiliteti financiar.
“Me rëndës është të ruhet stabiliteti i sistemit financiar. Shpresojmë të mos preket i integriteti i sistemit gjyqësor. Jam pak i shqetësuar që njerëzit po e politizojnë çështjen, kjo nuk e ndihmon aspak proçesin, duhet integritet”, tha ambasadori i SHBA-ve.
Takimi mes Metës e diplomatit amerikan u zhvillua ambientet e Kuvendit.
