Amerika

Trump: Nuk do të heq dorë nga mediat sociale

Presidenti Donald Trump sinjalizoi të martën se ka në plan të vazhdojë të ofrojë mendimet e tij me postimet e shpeshta në mediat sociale.

“Vetëm Mediat e Rreme dhe armiqtë e Trumpit duan që unë të mos i përdor Mediat Sociale (110 milionë njerëz),” shkruante Presidenti në llogarinë e tij në Twitter. “Është e vetmja mënyrë që unë të nxjerr të vërtetën!”

Megjithë pretendimin e zotit Trump, mediat kryesore tradicionale të lajmeve në SHBA, të cilat shpesh quhen prej Presidentit si “lajme të rreme”, nuk i kanë kërkuar atij të heqë dorë nga përdorimi i mediave sociale.

Përkundrazi, ato shpesh citojnë komentet e tij në Twitter dhe i shohin ato si një dritare për të kuptuar mendimet e tij në kohë të ndryshme të ditës, nga orët e hershme të mëngjesit deri në orët e vona të natës.

Megjithatë, disa ndihmës të Shtëpisë së Bardhë si dhe ligjvënës republikanë e demokratë e kanë kritikuar përdorimin e Twitterit nga Presidenti, i cili në gjashtë muajt e parë të presidencës ka bërë rreth një mijë komente.

Komentet e Presidentit në Twitter kanë natyrë nga më të ndryshmet: nga përgëzimet për kampionët e sporteve e deri te kritikat e ashpra për ligjvënës të ndryshëm, të cilët hedhin poshtë politikat që zoti Trump dëshiron të miratohen nga Kongresi.

Ndonjëherë zoti Trump i ka befasuar edhe ndihmësit e tij me komentet në Twitter, siç ndodhi javën e kaluar kur ai tha se kishte në plan të ndryshonte një politikë të ish-Presidentit Barak Obama dhe të ndalonte personat transgjinorë të shërbejnë në forcat e armatosura amerikane.

Related Articles

Leave a Reply

Your email address will not be published. Required fields are marked *

Back to top button