Home / Politika / Rama i përgjigjet opozitës: Asnjë ofendim gazetarëve, thjesht opinion

Rama i përgjigjet opozitës: Asnjë ofendim gazetarëve, thjesht opinion

Kryeministri Edi Rama ka reaguar sot në lidhje me pretendimet e opozitës se gazetarët janë ofenduar nga kryeministri  në prononcimin e tij për mediat para Kuvendit.

Nëpërmjet një postimi në statusin e tij social Facebook, kryeministri Rama që në krye të radhës shkruan se nuk ka patur asnjë ofendim për gazetarët, thjesht kam shprehur opinion tim.

 “Asnjë ofendim, thjesht opinion. Po pse qenkan ofenduar gazetarët nga unë? Sipas tyre po edhe sipas të tjerëve në kazanin mediatik e në atë politik, i paskam fyer sot pas seancës së Kuvendit!Fare! Nuk kam fyer askënd. Thjesht kam dhënë opinionin tim, për çka ata kanë bërë, gjatë gjithë këtyre ditëve duke e dizinformuar publikun lidhur me qëndrimet e mia dhe të Partisë Socialiste!”, shprehet Rama.

Më tej, kryeministri Rama shton se “Padiskutim ata janë në të drejtën e tyre të mos kuptojnë atë që thonë ose të thonë me qëllim gënjeshtra e budallallëqe. Janë në lirinë e tyre të dëgjojnë siç u bëjnë veshët apo kur nuk e dinë diçka, të mos përpiqen as ta mësojnë. Janë në punën e tyre që ta bëjnë punën duke shkelur me këmbë çdo normë e rregull bazik të një profesioni aq fisnik e të vështirë njëkohësisht”.

“Por as ata – dhe këtu nuk flas, siç nuk fola as sot thjesht për gazetarët e terrenit, po e kisha dhe kam me të gjithë ata që lirinë e pushtetit të medias janë mësuar ta përdorin si armë, për të “vrarë e prerë”, pa teklif e as karar – dhe as kushdo tjetër, nuk më ndalon dot mua të shpreh opinionin tim; qoftë për turpin që i mbetet kujtdo që e shtrembëron, shkel apo shkatërron të vërtetën nga pozitat e gazetarit, duke më vënë në gojë gjëra që s’i kam thënë dhe jo vetëm; qoftë për paditurinë që shfaqet brutalisht nga mëngjesi deri në darkë, si liri dhe e drejtë për të dhunuar lirinë e të drejtat e tjetrit, në emër të profesionit (kur je gazetar je ëngjëll, kur je politikan je djall, prandaj o burra bjeri t’i biem kujt të duam se brenda jemi); qoftë për transformimin e urës së komunikimit mes politikës e publikut, në një grykë thashethemnaje frenetike, ku nuk e merr vesh i pari të dytin!”, pohon Rama.

“Kështu që kush është ndjerë i ofenduar, të mos keqkuptohet. S’kam ofenduar askënd dhe s’ka asgjë për t’u ofenduar. Thjesht dikush, unë në këtë rast, u ka thënë në mexhelis se çfarë mendon për punën që kanë bërë tërë këtë javë, në raport me qëndrimet e mia e të Partisë Socialiste. Vetëm një gjë: Le ta pyesin njëherë publikun se çfarë mendon për ta, se kushedi u del që unë them atë që shumica e popullit nuk ka mikrofon t’ua thotë😊”, shkruan Rama.

Më herët, kryetari i PD-së, Basha, në statusin e tij Facebook është shprehur se “Sulmi ndaj gazetarëve është dhunë jo vetëm ndaj tyre, por dhunë ndaj gjithë shoqërisë, e cila pa gazetarinë dhe pa fjalën e lirë përfundon në errësirë dhe skllavëri”.

Leave a Reply

%d bloggers like this: