Ceremoni mirëseardhjeje në presidencë për Atin e Shenjtë
Papa Françesku mbërrin në Presidencë, ku u prit në një ceremoni mirëseardhjeje në oborrin e presidencës, nga Presidenti i Republikës Bujar Nishani.
Ati i Shenjtë, përshkoi me makinën e tij Bulevardin “Dëshmorët e Kombit”, duke u përshëndetur me duartrokitje nga mijëra qytetarë dhe besimtarë që kishin mbushur si asnjëherë tjetër sheshet e Tiranës për të pritur me entuziasëm Papa Françeskun, në këtë vizitë historike në vendin tonë.
Ceremonia e mirëseardhjes së Atit të Shenjtë nisi me ekzekutimin e Himnit të Vatikanit dhe Himnit Kombëtar të Shqipërisë, nga banda frymore e Gardës së Republikës.
Më pas Papa Françesku shkroi një shënim në Librin e Përshtypjeve në Presidencë, ku la një mesazh për të gjithë qytetarët shqiptarë. Ati i Shenjtë zhvilloi gjithashtu një takim me autoritetet më të larta në sallën e Pritjes në Presidencë.
Në fjalën e mbajtur në presidencë, Kreu i Shtetit, Bujar Nishani e konsideroi një ngjarje të madhe për kombin shqiptar vizitën e Papa Françeskut në Tiranë.
“Kjo është në ngjarje e madhe historike për kombin, për vendin, për të gjithë shqiptarët kudo që janë të cilët njëzëri thonë- Mirëserdhët në Shqipëri.
Ati i Shenjtë, Shqipëria në 24 vite liri, ka bërë progres të madh nga vendi më i izoluar në botë, sapo kemi marrë statusin e vendit kandidat falë edhe mbështetjes Tuaj të cilën dimë ta çmojmë”, deklaroi Presidenti Nishani.
Presidenti vuri në dukje harmoninë fetare mes besimeve fetare në vendin tonë. Krishtërimi dhe myslimanizmi, tha Nishani, në gjirin e këtij populli të lashtë dijnë veç të dialogojnë. “Kisha Katolike shqiptare dhe komunitetet e tjera fetare i rezistuan në mënyrë heroike komunizmit”, nënvizoi Presidenti. Sipas tij, Shqipëria i ka dhuruar martirë e shenjtorë botës në shekuj.
Mes nesh, u shpreh Nishani, nuk ka diskrimimin, intolerancë, ekstrizëm por respekt reciprok të trashëguar brez pas brezi harmoni e barazi të plotë të trashëguar nga kushtetuta e shtetit tonë laik.
“Ne përjetuam për gati 50 vite një diktaturë të egër ku komunizmi tentoi të ndryshojë antropologjinë humane, të krijojë njeriun e ri pa Zot, pa liri, pa objekte kulti. Fjalët e fundit të shumë prej priftërinjve katolikë para skuadrave të pushkatimit, ishin rroftë Shqipëria, rroftë Papa! Në emër të binomit atdhe e fe, ishin me dhjetëra klerikë që dhanë jetën e tyre. Ky eksperiment falë qëndresës së shqiptarëve, dështoi. Ishte një sfidë që shqiptarët e përballuan të gjithë sëbashku, si bij të të njëjtit Zot. Myslimanë e të krishterë u ngritën nga hiri në kërkim të lirisë. Selia e Shenjtë i ka ofruar ndihmë gjithmonë kombit tim. Heroi ynë kombëtar, simboli i lirisë kundër robërisë, Gjergj Kastrioti Skënderbeu ishte aleati i zgjedhur i Vatikanit. Pohoj me bindje se ligjëratat Tuaja janë një doktrinë e mirëfilltë për paqen në botë. Janë një reflektim i madh shpirtëror. Shqipëria sheh tek ju një mik të shtrenjtë të cilit sot i ka hapur derën dhe zemrën sipas zakonit të shqiptarëve. Sot kjo shtëpi është dy herë e juaja”, -u shpreh Nishani.
