Kronika

Italianët “rrëmbejnë” Nezar Seitin; Ministria e Drejtësisë lejon ekstradimin

Për surprizën e të gjithëve, Ministria e Drejtësisë ka lejuar sot ekstradimin drejt Italisë të atij që njihet si financier i Habilajve, Nezar Seiti, ndërkohë që për të kishte një masë ndalimi për llogari të Krimeve të Rënda. Me dërgimin në Itali të Nezar Seitit lindi një pikëpyetje e madhe se çfarë interesi mund të kenë tani italianët për të bashkëpunuar me drejtësinë shqiptare për çështjen Habilaj-Tahiri.
Anti-mafia italiane rrëmben nga burgu 313 Nezar Seitin, i akuzuar si financiar i grupit te Habilajve ne trafikun ndërkombëtar të narkotikeve. Nuk bëhet fjalë për një rrëmbim me forcë, por për një ekstradim ekstra-procedurial, me firmën e ministres së Drejtësisë, që injoron vendimet e Gjykatave të Shkallës së Parë dhe Apelit të Krimeve të Rënda si dhe një vendim të Gjykatës së Lartë, të cilat kanë vendosur arrest me burg për Seitin.

Ky i fundit është ekstraduar ditën e enjte drejt Italisë, pa dijeninë e avokatit dhe Prokurorisë së Krimeve të Rënda. Madje si për ironi të fatit, avokati i Seitit ka mësuar për ekstradimin pasi kishte firmosur zgjatjen e afatit te hetimeve për klientin e tij edhe me tre muaj të tjerë nga Prokuroria e Krimeve të Rënda.

Ndërsa burime pranë Prokurorisë së Krimeve të Rënda shprehen se nuk janë në dijeni mbi ç’baza ligjore është kryer ky ekstradim, në një kohë kur ndaj Seitit kishte një masë sigurimi arrest me burg. Zyra e shtypit e ministres së Drejtësisë shprehet se janë respektuar të gjitha procedurat për ekstradimin e Seitit, duke iu referuar një vendimi të dhjetorit të vitit të kaluar të Gjykatës së Tiranës që lejonte ekstradimin e tij.

Por pa dhënë ndonjë përgjigje se si është anashkaluar masa e sigurisë arrest me burg për llogari të krimeve të rënda. Për të njëtën ngjarje, zyra e shtypit e Prokurores së Përgjithshme të përkohshme është shprehur se ky institucion nuk kishte asnjë rol në procedurat e ekstradimit të Nezar Seitit.

Ndërsa policia e shtetit shprehte se Nezar Seiti u është dorëzuar në Rinas autoriteteve italiane në bazë të urdhrit nga ministria e Drejtësisë. Ky është një rast i paprecedente, kur një person nën hetim dhe me masë sigurimi arrest me burg nga Prokuroria e Krimeve të Rënda, ekstradohet për llogari të autoriteteve të huaja.

Emri i Nezar Seitit është regjistruar te Krimet e Rënda si i dyshuar bashkëpunëtor në grupin e Habilajve në të njëjtën kohë me emrin e ish-ministrit të brendshëm Saimir Tahiri, hetimet për të cilin ende vazhdojnë. Me marrjen në Itali të Nezar Seitit, ku prokuroria e Catanias po e heton së bashku me disa persona identitetet e të cilëve nuk bëhen ende të ditur, natyrshëm lind pyetja: A do të kenë interes italianët të sjellin në Shqipëri informacione të dobishme për llogari të hetimeve shqiptare për dosjen Habilij-Tahiri?!

Related Articles

Leave a Reply

Your email address will not be published. Required fields are marked *

Back to top button