Politika

Danimarka mbështetje Shqipërisë për integrimin në BE

Ministri për Evropën dhe Punët e Jashtme, Ditmir Bushati ka marrë mbështetjen për integrimin evropian të Shqipërisë nga Danimarka gjatë takimit me Ministrin e Punëve të Jashtme të Mbretërisë së Danimarkës, Anders Samuelsen.

Ministri Bushati i cili ndodhet për një vizitë zyrtare në Danimark, zhvilloi një takim sot me Ministrin e Punëve të Jashtme të Mbretërisë së Danimarkës, Anders Samuelsen ku në fokus diskutuan mbi procesin e integrimit evropian, dinamikën e marrëdhënieve dypalëshe, bashkëpunimin rajonal dhe çështje të sigurisë evropiane e më gjerë.

Ministri Bushati i shprehu mirënjohjen kolegut Samuelsen për mbështetjen ndër vite të Danimarkës për proceset transformuese demokratike në vendin tonë dhe në procesin e integrimit evropian.

“Duke u ndalur tek integrimi evropian, ministrat ndanë mendimin për impaktin transformues që ka politika e zgjerimit në vendet e rajonit të Ballkanit”, thuhet në njoftimin e MEPJ.

Më tej, ministri Bushati e njohu kolegun e tij me procesin e reformave ne Shqipëri, me fokus reformën në drejtësi dhe progresin e bërë në plotësimin e pesë prioriteteve. Ndërsa, ministri Samuelsen, duke konfirmuar mbështetjen e Danimarkës për perspektivën evropiane të Ballkanit Perëndimor dhe duke vlerësuar punën e bërë, u shpreh se “Komisioni Evropian është institucioni më i mirë për të vlerësuar progresin dhe se Danimarka do të mbështesë rekomandimin e Komisionit Evropian në raportin e tij për Shqipërinë në muajin prill”.

Më tej, ministri Samuelson shprehu vlerësim për bashkëngjitjen e plotë të Shqipërisë me vendimet e BE-së në politikën e jashtme dhe të sigurisë.

Duke diskutuan mbi situatën në rajon, ministri Samuelsen vlerësoi rolin konstruktiv të Shqipërisë në rajonin e Ballkanit  Perëndimor, si faktor i qëndrueshëm stabiliteti dhe bashkëpunimi rajonal. Në këtë kontekst, ministrat nënvizuan rëndësinë e forcimit të perspektivës evropiane të rajonit të Ballkanit, përmes një vizioni të qartë dhe gjithpërfshirës në Strategjinë e Zgjerimit që pritet të miratohet së shpejti.

Gjatë takimit, ministrat shkëmbyen mendime per çështjet e sigurisë globale me të cilat po përballet Evropa dhe bota.

Ministrat Bushati dhe Samuelsen vlerësuan bashkëpunimin dhe rolin e vendeve te tyre, edhe si vende anëtare të NATO-s, në luftën kundër terrorizmit dhe ekstremizmit të dhunshëm, IS, dhe rolin e aktorëve të tretë në krizat rajonale.

Ministri për Evropën dhe Punët e Jashtme zhvilloi dhe një takim me Nën-Sekretarin e Përhershëm në Kryeministri, Michael Starbæk Christensen, gjatë të cilit u diskutuan çështje të bashkëpunimit dypalësh dhe integrimit evropian.

Related Articles

Leave a Reply

Your email address will not be published. Required fields are marked *

Back to top button