Kosova

Thaçi: Gjykata Speciale nuk mund të shfuqizohet

Presidenti i Kosovës Hashim Thaçi, në një konferencë shtypi tha, se Gjykata Speciale as nuk mund të shfuqizohet dhe as nuk do të shfuqizohet.

Presidenti i Kosovës, Hashim Thaçi, tha se Gjykata Speciale, as nuk mund të shfuqizohet dhe as nuk do të shfuqizohet. “Ky është qëndrim i shtetit të Kosovës”. Këtë deklaratë, presidenti i Kosovës, Hashim Thaçi, e bëri në një konferencë për media (01.02) në prag të shënimit të dhjetëvjetorit të shpalljes së pavarësisë së Kosovës. 43 nënshkrimet e deputetëve që kërkonin të shfuqizohet ligji për Gjykatën Speciale, akoma nuk janë tërhequr, mirëpo, kryesia e Kuvendit të Kosovës, tashmë këtë nismë e ka dërguar në qeverinë e Kosovës që të japë mendimin e saj. Presidenti i Kosovës, Hashim Thaçi, tha se këtë qëndrim shtetëror e shprehu pas konsultimeve me kryetarin e parlamentit Kadri Veseli dhe kryeministrin Ramush Haradinaj. Dy vjet më parë Presidenti Thaçi, ishte shtytësi kryesor për miratimin e ligjit për Gjykatën Speciale, ndërsa, edhe sot kur në Kosovë tash e një muaj ka një debat të nxehtë rreth mundësisë së shfuqizimit të Gjykaës Speciale, ai nuk e ka ndryshuar qëndrim.

“Në vitin 2015 për këtë gjykatë, kishte vetëm dy opsione. Të dy opsionet, ishin të këqija, por është dashur që të zgjidhej e keqja më e vogël. Ose të themelohet kjo gjykatë përmes Këshillit të Sigurimit ose përmes legjislacionit të Kosovës në koordinim me partnerët ndërkombëtarë. Në këtë kuadër duke pasur parasysh vizionin për të ardhmen, ruajtjen e partneritetit dhe miqësisë dhe besimit me Shtetet e Bashkuara të Amerikës, NATO-n dhe Bashkimin Evropian, kam marrë përgjegjësitë që më takonin atëherë si kryeministër i vendit, për trajtimin e raportit të Dick Martyt, që për mua është fantastiko-shkencor, tha Thaçi.

Presidenti tha se ai vazhdon të jetë i bindur se UÇK-ja ka bërë luftë të drejtë dhe Kosova s’ka pse i frikësohet Gjykatës Speciale.

“Kosova dhe UÇK-ja kanë zhvilluar luftë të drejtë. Ne e themeluam gjykatën dhe për këtë nuk kemi pse të frikësohemi. E dimë që është e padrejtë, por është diçka që duhet ta gëlltisim për ruajtjen e partneritetit me BE-në NATO-on dhe SHBA-së tha ai.

Pothuajse në të njejtën linjë është shprehur edhe kryeministri i Kosovës, Ramush Haradinaj, duke mbështetur qëndrimin e Presidentit të Kosovës, Hashimm Thaçi.

“Presidenti e komunikoi qëndrimin shtetëror në bazë të hierarkisë, që duhet të tërhiqet inciativa për shfuqizimin e Gjykatës Speciale. Dhe unë e respetoj këtë qëndrim të presidentit. Pavarësisht procedurave, nëse ka një vendim politik atëherë edhe qeveria do të veprojë ashtu”, u shpreh kryeministri Ramush Haradinaj.

Presidenti i Kosovës, Hashim Thaçi, nga ana e tij ka hedhur poshtë çdo mundësi që të ketë ndikuar tek 43 deputetët që hodhën nënshkrimet për shfuqizimin e Gjykatës Speciale. Thaçi, tha se deputetët kanë mandatin e popullit dhe nuk i takon atij që të ballafaqohet me ta rreth nismave që ndërmarrin. Nisma e deputetëve për shfuqizimin e Gjyaktës Speciale ndodhi me 22 dhjetor të vitit 2017 dhe Presidenti Thaçi nuk e kishte kundërshtuar e as përkrahur. Kjo nismë nxiti edhe reagime të ashpra të faktorit ndërkombëtar, që madje reagoi me tone të ashpra se “secili nga deputetët dhe politikanët që e mbështesin shfuqizimin e Gjykatës Speciale, do të ballafaqohet me pasoja.

Ideja për themelimin e Gjykatës Speciale për krime lufte në Kosovë, pasoi hetimet e të dërguarit të Këshillit të Evropës senatorit zviceran Dick Marty në vitin 2015. Një raport i tij, që përmbante akuza ndaj ish-pjesëtarëve të Ushtrisë Çlirimtare të Kosovës për rrëmbime të pjesëtarëve të pakicave, keqtrajtime, vrasje pa gjyq deri në trafikim organesh, iu paraqit në Këshillin e Evropës. Të gjitha këto pretendime janë hedhur poshtë nga ish-udhëheqësit e UCK-së. Në fillim të muajit gusht të vitit 2015, ndërkaq, pas një trysnie ndërkombëtare, parlamenti i Kosovës miratoi me shumicë votash ligjin për Gjykatën Speciale, e cila ka selinë e saj në Hagë dhe e cila do të veprojë vetëm me gjykatës e prokurorë ndërkombëtarë. Tashmë çdo procedurë ligjore dhe administrative ka përfunduar dhe Gjykata Speciale ligjërisht është e gatshme të nisë punën. Gjykata Speciale për krime lufte në Kosovë pritet të hetojë krimet e pretenduara të pjesëtarëve të ish-Ushtrisë Çlirimtare të Kosovës, që siç thuhet, të kryera ndaj pjesëtarëve të komuniteteve pakicë dhe kundërshtarëve politikë gjatë periudhës 1998-2000.

Related Articles

Leave a Reply

Your email address will not be published. Required fields are marked *

Back to top button