SHBA & BE: Asadi ka përdorur sërish gazin klorin kundër civilëve
Sulme kimike kundër civilëve me gaz klorin janë kryer në Siri gjatë muajit gusht nga regjimi i presidentit Bashar al Assad, njoftuan Shtetet e Bashkuara të Amerikës dhe Bashkimi Evropian, pas një raporti të misionit hetimor të OPCW-së.
”Sulmet janë kryer me helikopterë, të cilët i posedojnë vetëm forcat e regjimit dhe jo rebelët”, theksuan SHBA-ja dhe BE-ja. Gjatë një ndërhyrjeje në Këshillin Ekzekutiv të Organizatës për Ndalimin e Armëve Kimike (OPCW), përfaqësuesi amerikan deklaroi se vendi i tij është ”shumë i alarmuar nga konfirmimet e drejtpërdrejta mbi faktin se Siria vazhdon të përdorë armë kimike në mënyrë të përsëritur dhe sistamatike”.
”Përgjegjësit e këtyre sulmeve duhet të përgjigjen”, theksoi ai.
Ndërkohë, duke folur në emër të BE-së, ambasadori italian, Francesco Azzarello nënvizoi se “Siria duhet t’i dëshmojë komunitetit ndërkombëtar se ka hequr dorë përfundimisht nga programi i armëve kimike”.
“Bashkimi Evropian është i shqetësuar për sigurinë dhe situatën humanitare në Siri. Zgjidhja e krizës duhet të bëhet vetëm me mjete politike”, shtoi ai.
