Bota

SHBA, 20 mln dollarë Meksikës për të deportuar emigrantët

Administrata amerikane duket e gatshme të paguajë miliona dollarë, për të ndihmuar Meksikën të deportojë mijëra emigrantë që kanë hyrë në vend me shpresën për të mbërritur një ditë në Shtetet e Bashkuara.
Sipas një njoftimi të zyrtarëve të Departamentit amerikan të Shtetit, dërguar Kongresit, shuma prej 20 milionë dollarësh mund të përdoret për të mbuluar kostot e autobusëve apo biletave të avionit për të deportuar emigrantët nga Meksika drejt vendeve të tyre të origjinës.

Fondet do të transferohen nga DASH drejt Departamentit të Sigurisë së Brendshme, si pjesë e një programi pilot për “largimin e emigrantëve”, gjë që mund të rezultojë në deportimin e rreth 17 mijë personave nga Meksika.

“Kjo shumë e njëhershme asistence do të ndihmojë qeverinë e Meksikës të adresojë, e madje të pengojë, fluket e emigrantëve të paligjshëm, duke i mbajtur kështu ata larg mundësisë së hyrjes së Shtetet e Bashkuara përmes kufirit jugperëndimor”, thuhet në njoftimin dërguar Kongresit.

Sipas programit, autoritetet meksikane do të jenë përgjegjëse për ndalimin, paraburgimin, shqyrtimin e kërkesave për azil dhe procedurat e tjera të emigracionit në përputhje me ligjet meksikane dhe ato ndërkombëtare.

“Shtetet e Bashkuara vetëm sa do të financojnë biletat e linjave ajrore normale, apo fluturimeve ‘charter’, sikurse edhe mjetet e transportit rrugor apo hekurudhor”, thuhet gjithashtu në njoftim.

Megjithatë, mbrëmjen e vonë të së enjtes Ministria e Jashtme meksikane reagoi përmes një deklarate, ku tha se qeveria e Meksikës është ende duke e shqyrtuar planin dhe nuk ka dhënë ende akordin për të, as verbalisht dhe as zyrtarisht.

“Qeveria meksikane do të vazhdojë të bashkëpunojë me qeverinë amerikane sa i përket çështjes së emigracionit, duke kërkuar për çdo rast dhe në mënyrë konstruktive të promovojë emigracion të rregullt, ligjor dhe të sigurtë, në respekt të plotë të të drejtave të njeriut dhe ligjeve ndërkombëtare”, ishte reagimi i Ministrisë së Jashtme.

Related Articles

Leave a Reply

Your email address will not be published. Required fields are marked *

Back to top button