Politika

Rama me policen e plagosur, i premton operacion në Turqi. Oficerja e plagosur tregon tmerrin

Kryeministri Edi Rama takoi në spital policen e plagosur gjatë protestës së sotme para Parlamentit.
Në një video ekskluzive të Top Channel, kreu i qeverisë dëgjohet duke i premtuar nënës së Ina Nukës se vajza e saj do të dërgohet në Turqi për një operacion.

“Nesër ose pasnesër do të kryhet operacioni. Operacioni është i mundshëm, i gjatë, por gishtat rivihen dhe për një periudhë kohe rimarrin funksionin. Ju kam sjellë dhe një telefon që t’i bëjë mesazhet me gishtat e rivendosur”, tha Rama.

Në një rrëfim ekskluziv për emisionin “Open” me Eni Vasilin, policja e plagosur në dorë, Ina Nuka tregon momentin e plagosjes nga një plasëse.

“Ishim me shërbim te Parlamenti për protestën. Situata agravoi dhe turma nisi të shtynte. Isha në rreshtin e dytë dhe një nga këto plasëset më ra në trup dhe u mundova ta shmang me dorën e djathtë, pasi e kisha në pjesën e qafës”, tregon Nuka.

“Policia nuk është këtu për të krijuar rrëmujë, por është këtu për të ruajtur rendin”. Kështu do të shkruante pak kohë më parë në rrjetet sociale teksa postonte një foto nga puna e përditshme, efektivja e plagosur gjatë protestës para Parlamentit.

Por, 24-vjeçarja Ina Nuka, efektive e repartit “Shqiponja”, nuk e dinte se një ditë si kjo e enjte, asaj do t’i rrezikohej jeta në krye të detyrës. Ajo ishte vendosur në rreshtin e parë të kordonit të policisë, kur një shashkë i shpërtheu pranë dorës së djathtë, duke humbur dy gishta.

Në spital, të lënduarit e policisë i vizitoi edhe kryeministri Edi Rama. “Prerja e gishtave të vajzës është vërtetë një vijë e kuqe që është vendosur sot mes atyre që kanë marrë përsipër t’i kundërvihen ligjit dhe Policisë së Shtetit që është në mbrojtje të ligjit dhe në mbrojtje të interesave publike. Nuk ka shans që ligji të mos zbatohet njësoj për të gjithë. Sa më shumë i bien ndesh ligjit, aq më shumë do të përballen me ligjin”, tha Rama.

24-vjeçarja kishte 3 vite që i ishte bashkuar Policisë së Tiranës, ndërsa më parë kishte përfunduar edhe studimet në Universitetin e Sporteve.

Related Articles

Leave a Reply

Your email address will not be published. Required fields are marked *

Back to top button