Blackhat, kur hakeri është muskuloz
“Blackhat”, filmi i ardhshëm i Michael Mann, që do të dalë në kinematë amerikane janarin e vitit të ardhshëm, përgënjeshtron steriotipin e piratëve informatikë, të cilët supozohet të jenë të mbyllur, të veshur keq dhe që jetojnë në hapësira të vogla të rrethuar nga monitorët e kompjuterëve.
Në këtë prodhim të ri të zhanrit “cyber-thriller” protagonist në rolin e Nicholas Hathaway është Chris Hemsworth, aktori që shumë e njohin për interpretimin e heroit Thor.
Faktikisht Nicholas është një ish-kriminel që lirohet nga burgu për t’i bërë ballë një kërcënimi që autoritetet nuk e mposhtin dot.
Bëhet fjalë për një rrjet hakerash që kërcënojnë sigurinë e gjithë botës, në kërkim të të cilit janë angazhuar shërbimet sekrete amerikane dhe ato kineze.
Nga pamjet e para të filmit bie në sy pikërisht veçoria e sipërpërmendur: Hathaway është një haker që ndodhet në burg, por në formë të shkëlqyer fizike.
Gjithashtu, kur ndodhet jashtë tij ai duket mjaft i zoti të zihet me grushte, të përballet me agjentët dhe të tregojë që nuk i trembet askujt.
Filmi është xhiruar në Kaliforni, Hong Kong, Indonezi dhe Malajzi dhe kanë nisur në korrik 2013. Regjisori Michael Mann është i njohur për filmat “Heat”, “Miami Vice”, “Collateral”, “Armiku Publik”, etj.
