Kronika

Arrestohen dy mjeke ne Elbasan

Policia e Elbasanit ka arrestuar dy mjekë pas vdekjes së 25-vjeçares Rexhina Debrova pak minuta pas lindjes. Sipas informacioneve të para janë arrestuar mjeku reanimator Nikollaq Thano si dhe mjeku kardiolog Mehmet Ibaj.

Ndonëse shkaqet e sakta të vdekjes së nënës së re do të mësohen pas autopsisë, nga spitali u tha se e reja pësoi komplikacion. Sipas spitalit, pacientja e cila do të bëhej nënë për herë të parë kishte shkuar me urgjencë në spital, me barrë të vonuar 42-javëshe dhe është futur në sallë. Mjekët asistuan lindjen e fëmijës, i cili erdhi në jetë në orën 11:50.

“Specialistët e Hetimit të Krimit në Komisariatin e Policisë Elbasan, arrestuan në flagrancë shtetasit: M.I., 54 vjeç,  banues në Elbasan dhe N.TH., 60 vjeç,  banues në Cërrik, ( të dy me detyrë mjekë pranë Spitalit Rajonal Elbasan),  pasi gjatë operacionit (për  lindjen e fëmijës) ka ndërruar jetë shtetasja R.D., 25 vjeçe, banuese në Elbasan.

Materialet hetimore i kaluan Prokurorisë pranë Gjykatës së Shkallës Parë Elbasan për veprën penale “Mjekim i pakujdesshëm”.”-njofton policia.

Por nëna e re dyshohet se pësoi komplikacion postoperator trombemboli pulmonare, e papajtueshme me jetën.

25-vjeçarja nga Katundi i Ri ndërroi jetë pasi solli në jetë fëmijën e saj të parë në maternitetin e Elbasanit, fatmirësisht foshnja gëzon shëndet të plotë.
Familjarët e 25-vjeçares, akuzojnë mjekët për pakujdesi. Sipas tyre, pas përkeqësimit të gjendjes së saj shëndetësore, gjinekologu ka kërkuar ndihmë nga kolegët e kardiologjisë sepse ka konstatuar probleme me zemrën. Familjarët pretendojnë se mjeku kardiolog ka mbërritur me vonesë.

Related Articles

Leave a Reply

Your email address will not be published. Required fields are marked *

Back to top button