Kroacia, shembull nxitës për Shqipërinë dhe vendet e rajonit
Ambasadori i Republikës së Shqipërisë në Kroaci, Ilir Melo, i dorëzoi sot letrat kredenciale Presidentit të Republikës së Kroacisë, Ivo Josipović.
Ambasada e Shqipërisë në Kroaci njofton se ceremonia u zhvillua në Pallatin Presidencial të Kroacisë.
Pas ceremonisë së dorëzimit të Letrave Kredenciale, Presidenti Josipovic dhe Ambasadori Melo, patën një audiencë të posacme.
Z. Josipović, i uroi mirëseardhjen dhe suksese në detyrën e re z. Melo dhe më tej u zhvillua një bisedë në frymë tepër miqësore, gjatë të cilës u vlerësuan marrëdhëniet e shkëlqyera ndërmjet dy vendeve, si dhe bashkëpunimi për çështje dypalëshe apo rajonale.
Melo nënvizoi se Kroacia, si vend i NATO-s dhe BE-së, është një shembull nxitje për Shqipërinë dhe vendet e rajonit dhe në këtë kuadër synohet forcimi i partneritetit midis dy vendeve, ku fusha e integrimit në BE mbetet prioritare.
