Kronika

Ministrja Xhaçka në Letoni: Aty ku humbi jetën nëntetare Hasanaj dhe u plagosën dy të tjerë

Ministrja e Mbrojtjes, Olta Xhaçka, më pak se 24 orë nga ngjarja në bazën Camp Adazi në Letoni, udhëtoi ditën e martë, më 7 maj drejt Rigës për të vizituar Kontigjentin e 4-t, EOD, ku më 6 maj nga shpërthimi i disa municioneve humbi jetën 32 vjeçarja shqiptare, nëntetare Zarife Hasanaj dhe u plagosën dy të tjerë, por edhe për t’u takuar me drejtues të bazës ku që prej vitit 2017, Shqipëria përfaqësohet me trupat e saj si pjesë e misionit të NATO-s “enhanced Forward Presence”.

Fillimisht ministrja Xhaçka vizitoi dy efektivët e plagosur, njëri prej të cilëve, major Klodian Tanushi, ndodhet në gjendje të rëndë shëndetësore në spitalin Riga East University Hospital. Ministrja e Mbrojtjes u takua me mjekët që po ndjekin me vëmendje maksimale gjendjen e major Tanushit.

Më pas, ministrja Xhaçka e shoqëruar nga gjeneralmajor Nazmi Cahani, përfaqësuesi ushtarak i Shqipërisë në selinë qendrore të NATO-s në Bruksel dhe atasheu ushtarak shqiptar kolonel Fadil Ciroku, mbërritën në bazën ushtarake Camp Adazi. Në takimin me efektivët shqiptarë, ministrja e Mbrojtjes shprehu dhimbje për ngjarjen e ndodhur një ditë më parë, ku si pasojë e shpërthimit të municioneve të paplasura, gjatë kryerjes së detyrës, humbi jetën nëntetare Zarife Hasanaj e u plagosën major Klodian Tanushi dhe rreshter Julian Kapaj.

Në mënyrë të veçantë, ministrja Xhaçka u interesua për dy efektivet, Enkelejdën dhe Nadjën, të cilat janë pjesë e kontingjentit të mbërritur në Letoni 5 muaj më parë.

“Dhimbja është e përbashkët dhe unë jam sot këtu me ju për të ndarë bashkë hidhërimin, por edhe për te gjetur forcën. Familjet e 3 efektivëve, ju dhe familjet tuaja, do të keni mbështetjen time personale, por edhe të secilit prej 8 mijë efektivëve të familjes sonë të madhe ushtarake, për të kapërcyer këtë moment të vështirë. Ju nuk do të jeni kurrë vetëm dhe asnjëherë s’do të jenë vetëm familjet e çdo burri dhe gruaje në uniformë”,- tha ministrja e Mbrojtjes gjatë bashkëbisedimit me efektivët.

Djemtë dhe vajzat e kontingjentit, misioni i të cilit përfundon pas pak javësh, thanë se janë të vendosur për të përfunduar plotësisht dhe me dinjitet misionin, jo vetëm si detyrim kushtetues, por mbi të gjitha për të vijuar angazhimin e lënë në mes nga kolegët e tyre.

Në takimin me ministren Xhaçka, drejtuesit ushtarakë kanadezë e letonezë të bazës, shprehën vlerësimet maksimale për përfaqësimin dinjitoz dhe profesionalizmin e efektivëve shqiptarë në këto dy vite të përfshirjes së tyre të misionit të NATO në Letoni.

Trupi i nëntetares Zarife Hasanaj,  që humbi jetën ditën e hënë, më 6 maj 2019, do të mbërrijë në Atdhe më datë 9 maj me avion ushtarak. Në nderim të nëntetares Zarife Hasanaj, e cila u nda nga jeta gjatë misionit në Letoni, ditën e premte, më 10 maj 2019, do të organizohet një ceremoni shtetërore.  Trupi i efektives Zarife Hasanaj do të shoqërohet nga një efektiv kanadez, një letonez dhe kolegë të saj shqiptarë, pjesë të kontigjentit ku bënte pjesë. Zarife Hasanaj do të pritet në aeroportin “Nënë Tereza”, me protokoll ushtarak e më pas trupi i saj do të dërgohet pranë familjes.

Related Articles

Leave a Reply

Your email address will not be published. Required fields are marked *

Back to top button