Xhandarmëria shkel 8 km në brendësi të territorit të Kosovës
Xhandarmëria serbe ka vazhduar provokimet ndaj shtetit të Kosovës. Radio Televizioni i Kosovës (RTK) ka mësuar nga burimet e veta se ditë më parë pikërisht me 31 maj te ketij viti, në fshatrat e thella të malësisë së Kamenicës një ekip me katër pjesëtarë kufitarë nga xhandarmëria serbe janë futur në territorin e Kosovës duke lëvizur rreth 8 kilometra nëpër territorin e Kosovës.
Xhandarët serbë kanë lëvizur nëpër territorin e Kosovës më shumë se tetë kilometra, derisa kjo rrugë gjendet rreth dy kilometra vijë ajrore brenda territorit të Kosovës.
Gjatë lëvizjes së tyre nëpër territorin e Kosovës, nuk ka pasur ndonjë akses ose ndonjë ndalesë të qytetarëve të cilët posedojnë ferma në atë rajon ose merren me prerje të pyjeve, por banorët janë shqetësuar nga veprimi i xhandarmërisë serbe. Ky është një provokim i radhës i shtetit serb ndaj shtetit të Kosovës, pasi kjo nuk është hera e parë që ndodh një gjë e tillë.
