Ekonomia

Kriza e të ardhurave, Qeveria shkurton me 100 milionë euro buxhetin e vitit 2019

Ministri e Financave parashikon të grumbullojë 474 miliardë lekë gjatë këtij viti, nga 486 miliardë lekë që raportohen ne buxhetin e ndryshuar nga akti normativ i fundit, ose 12 miliardë lekë më pak (rreth 100 mln euro).

Sipas të dhënave nga Ministria e Financave të azhurnuara në relacionin e projektbuxhetit 2020 të ardhurat totale të në fund të vitit 2019, pritet të jenë 474 miliardë lekë. Krahasuar me fatin e vitit 2018 ku të ardhurat e grumbulluara ishin 359.9 miliardë lekë, rritja e pritshme këtë vit rezulton 5.34%, ose 24 miliardë lekë më shumë.

Totali i të ardhurave në raport me PBB-në në fund të këtij viti pritet të arrijë në 27.8%, nga 27.6 % që ishte në vitin 2018.

Të ardhurat fiskale që administrohen nga Drejtoria e Përgjithshme e Tatimeve (DPT) dhe Drejtoria e Përgjithshme e Doganave (DPD), përfshirë kontributet e sigurimeve shoqërore dhe shëndetësore,  pritet të realizohen në nivelin 97.3%. Të ardhurat e arkëtuara  nga administrata fiskale  janë rritur +4,12 %, ose, 16,2 miliard lekë krahasuar me vitin 2018.

Performanca e të ardhurave nga TVSH në import është ndikuar nga rënia e kursit të këmbimit të monedhës EURO kundrejt Lekut. Ky faktor, sipas Ministrisë së Financave ka krijuar efekte negative  në të ardhurat nga TVSH-ja  për mallrat e importit. Vetën për periudhën 9 mujore Janar-Shtator, ky efekt negativ në të ardhurat e TVSH-së për mallrat e importit  ka qene -1.9 miliard lekë, ndërkohë që efekti i pritshëm vjetor pritet të jetë -2.5 miliard lekë.

Faktor tjetër është rënia e çmimeve të metaleve dhe naftës në tregjet ndërkombëtare me efekt  1 miliard lekë për periudhën janar-shtator dhe efekt të pritshëm vjetor 1,3 miliard lekë.

Gjithashtu heqja e TVSH-së për imputet dhe makineritë bujqësore me efekt  1,2 miliard lekë për periudhën janar-shtator dhe efekt të pritshëm vjetor 1,5 miliard lekë.

Pritshmëria e të ardhurave nga Administrata Tatimore është ndikuar negativisht nga të ardhurat nga TVSH-ja.

Të ardhurat nga Tatimi mbi Vlerën e shtuar brenda vendit pritet të realizohen në masën 30.8 miliardë lekë, 80% kundrejt planit. Në total, Administrata Tatimore pritet të arkëtojë në buxhet në vitin 2019  rreth 49,8 miliard lekë,  nga 50,9 miliard lekë të arkëtuara në vitin 2018.  Krahasuar me vitin 2018, rimbursimi i TVSH-se rritet 32 % ose +4,6 miliard lekë. Ministria e Financave sqaron se ulja e të ardhurave nga TVSH-ja e brendshme lidhet edhe me dy faktorë të rëndësishëm:

-Së pari ulja e prodhimit të energjisë elektrike dhe rritja e importeve të saj çka ka ulur TVSH-në e brendshme dhe ka rritur TVSH në import 2,4 miliard lekë vetëm për 9 mujorin janar-shtator

-Së dyti ndryshimi i skemës së Projektit TAP nga furnizime me TVSH ne furnizime të përjashtuara.

Të ardhurat nga Tatimi mbi Fitimin pritet të realizohen në masën 35.2 miliardë lekë, 1.7 miliardë lekë ose 5% më shumë se plani vjetor i parashikuar. Rezultati pozitiv financiar i kompanive në vitin 2018, reflektoi rritjen e fitimit të tatueshëm dhe tatimit të paguar nga ana e tyre në vitin 2019. Veçanërisht, situata pozitive e sektorit energjitik gjatë vitit 2018, ka lejuar kompanitë e këtij sektori që të paguajnë në Buxhetin e Shtetit gjatë vitit 2019, jo vetëm tatimin mbi fitimin e vitit 2018, por edhe  një pjesë të detyrimeve të papaguara nga vitet e kaluara.

Tatimi mbi të Ardhurat Personale pritet të realizohet 47.9 miliardë lekë, +6 miliardë lekë ose 14.3%  mbi planifikimin. Të ardhurat e të punësuarve në sektorin publik e privat janë rritur përkatësisht me 9.1% dhe 5.2% kjo si rezultat i rritjes së numrit të të punësuarve dhe nivelit të pagës. Ulja e normës së tatimit mbi dividentin nga 15 % në 8 %, ka gjeneruar në buxhetin e shtetit  mbi 11 miliard lekë të ardhura, nga 3,5 miliard lekë që janë arkëtuar si divident në vitin 2018.

Related Articles

Leave a Reply

Your email address will not be published. Required fields are marked *

Back to top button