Kërkime në vilën e familjes Lala për gjetjen e binjakëve 2-vjeçarë

Vijojnë kërkimet për gjetjen e anëtarëve të tjerë të familjes Lala në Kënetë të Durrësit.

Mësohet se aktualisht po bëhen kontrolle në katin e dytë ku dyshohet se janë binjakët 2-vjeçarë të familjes Lala.

Dionis e Dionisa Lala, janë dy binjakët e kësaj familjeje, më e prekura nga tërmeti në Durrës. Ndërkohë qëdyshohet se janë ende 6 anëtarë nën rrënoja.

Ramë Lala, rreth 17 vjeç, pjesëtar i familjes Lala, ka arritur të shpëtojë. Ai u nxor dje nga rrënojat dhe ishte relativisht në gjendje të mirë shëndetësore.

Shembja e vilës në zonën e Kënetës në Durrës, bllokoi nën rrënoja tetë pjesëtarë të një familjeje. Mes tyre një pjesë janë gjetur të vdekur dhe një pjesë janë ende nën rrënoja.

Sadete Lala një e moshuar rreth 75 vjeçe, është gjetur e vdekur nën rrënoja. Po ashtu i vdekur është nxjerrë edhe djali i saj i paralizuar, Ilir Lala.

Të pagjetur vijojnë të jenë Griselda Lala, rreth 15 vjeçe. Marjeta Lala, nusja e djalit të Sadetes, kunata e Ilirit, rezulton e zhdukur, gjithashtu edhe Emilio Lala.

Vajza 6 vjeçe e Marjeta Lalës, Amelia Lala është nxjerrë e pajetë. Binjakët 2-vjeçar Dionis dhe Dionisa Lala, gjithashtu fëmijët e Marjetës, rezultojnë të zhdukur.

Deri më tani në total si pasojë e lëkundjeve të tërmetit, janë konfirmuar 26 viktima dhe mbi 650 të plagosur.