Kosova

AAK dhe Aleanca Kosovare e Bizneseve nuk dëshirojnë heqjen e taksës me Serbinë

Agim Shahini nga Aleanca e Kosovare e Bizneseve tha se qeveria e re nuk duhet të heq taksat, pasi sipas tij ato kanë një ndikim pozitiv në ekonominë vendore, duke bërë thirrje që reciprociteti të vendoset krahas taksave.

Partia opozitare e Kosovës Aleanca për Ardhmërinë e Kosovës (AAK), si dhe Aleanca Kosovare e Bizneseve janë angazhuar që të mos hiqen taksat prej 100 për qind të importeve të produkteve nga Serbia dhe Bosnjë e Hercegovina, pasi ato kanë ndikuar në rritjen e prodhimit vendor, raporton Anadolu Agency (AA).

Grupi Parlamentar i AAK-së organizoi një tryezë të rrumbullakët për taksat në ambientet e Kuvendit të Kosovës, ku përpos deputetëve dhe përfaqësuesve të AAK-së, pjesëmarrës ishin edhe prodhuesit, importuesit, shitësit me shumicë, përfaqësues të OJQ-ve dhe ekspertë të fushës.

Deputeti i AAK-së, Gazmend Abrashi, duke hapur tubimin, kujtoi se taksat u vendosën kryesisht për shkak të politikës agresive të Beogradit kundër shtetit të Kosovës. Ai gjithashtu theksoi mosrespektimin e marrëveshjes së CEFTA-s nga ana e Serbisë para zbatimit të taksave. Ai tha se pikëpamja e AAK-së ishte se taksat prej 100 për qind nuk duhet të hiqen dhe se reciprociteti nuk mund të japë një efekt më pozitiv sesa taksat, sepse reciprociteti nuk mund të parandalojë politikën e Serbisë kundër Kosovës.

“Hulumtimet dhe analizat e bëra nga Oda Ekonomike e Kosovës dhe Aleanca Kosovare e Bizneseve vërtetojnë që efektet pozitive të taksës janë manifestuar në rritje të dukshme të shitjeve të produkteve vendore, rritje të prodhimtarisë, rritje të lehtë në punësim, sidomos në sektorin e prodhimit, e veçanërisht në ngritjen e vetëdijes së konsumatorëve për konsumin e produkteve vendore”, tha Abrashi.

Ai theksoi se Serbia, e cila humbi gati 500 milionë euro për shkak të humbjes së tregut të Kosovës, ka ndërprerë dialogun me Kosovën dhe kjo situatë e krijuar rishtazi ka sensibilizuar lojtarët kryesorë ndërkombëtarë vendimtar për arritjen e një marrëveshjeje përfundimtare ndërmjet Kosovës dhe Serbisë.

AAK tha se taksat mund të përdoren si kusht për një marrëveshje përfundimtare detyruese midis dy vendeve.

Edhe Agim Shahini nga Aleanca e Kosovare e Bizneseve gjithashtu tha se qeveria e re nuk duhet të heq taksat, pasi sipas tij ato kanë një ndikim pozitiv në ekonominë vendore. Shahini bëri thirrje që reciprociteti të vendoset krahas taksave.

“Aleanca e Biznesit e ka vlerësuar taksën si aset kombëtar, aset ekonomik, politik, diplomatik, dhe për të gjitha këto tashmë vendi ka diçka që mund të ofrojë në këmbim të diçkaje që mund të merr më shumë. Bizneset gjatë kësaj periudhe shpejt kanë gjetur zëvendësim të importit edhe të lëndës së parë por edhe të produkteve tjera për konsum. Efekti i kësaj takse ishte sepse përpos që rriti zhvillimin ekonomik të brendshëm, e sipas këtij hulumtimi 100 milionë (euro) është rritur qarkullimi i brendshëm falë taksës. Kjo ka pasur efekt edhe në rritjen e vetëdijes konsumuese të qytetarëve dhe konsumatorëve”, tha Shahini.

Shahini theksoi se përveç efekteve pozitiveve, ka pasur edhe efekte negative pasi zyrtarët ndërkombëtarë theksuan se procesi i liberalizimit të vizave u ngadalësua, ndërsa nga ana tjetër, u ndërpre edhe korrigjimi i kufijve.

Hil Dulaj nga një kompani farmaceutike tha se taksat kishin kontribuar në një rritje të prodhimit të brendshëm dhe për këtë arsye nuk duhet të hiqet. Edhe Refki Zogaj nga sektori i bujqësisë gjithashtu tha se taksat kishin një efekt pozitiv dhe se bizneset vendase gjetën rrugë të tjera për importimin e mallrave.

Qeveria mëparshme e Kosovës, e udhëhequr nga ish kryeministri Ramush Haradinaj, kryetar i AAK-së, në nëntor të vitit 2018 vendosi taksa që bllokuan dialogun me Serbinë. Të gjithë aleatët ndërkombëtarë kërkojnë heqjen e taksave për të rikthyer Serbinë në tryezën e bisedimeve. Qeveria e re ka njoftuar heqjen e taksave dhe vendosjen e reciprocitetit ndaj Serbisë.

Related Articles

Leave a Reply

Your email address will not be published. Required fields are marked *

Back to top button