Politika

Shqipëria, kandidate për anëtare e Këshillit të Sigurimit

Presidenti Meta kërkon mbështetjen e anëtarëve të OKB-së

Presidenti Ilir Meta kërkoi sot mbështetjen e vendeve të OKB-së për kandidaturën e Shqipërisë si anëtare e Këshillit të Sigurimit.

“Kandidatura e Shqipërisë si anëtare jo e përhershme e Këshillit të Sigurimit të OKB-së për vitet 2022-2023, është një zotim për t’u angazhuar në të gjitha përpjekjet që synojnë ruajtjen e paqes dhe të sigurisë ndërkombëtare, për të mbështetur zhvillimin e demokracisë dhe për të mbrojtur të drejtat e njeriut”, tha Presidenti Meta, duke iu drejtuar Takimit të Nivelit të Lartë të Përkujtimit të 75-vjetorit të themelimit të Kombeve të Bashkuara.

Më tej, Meta u ndal tek vlerat e Shqipërisë si një faktor paqeje. .“Vendi im, vijoi ai, ndan plotësisht vizionin për një rajon më të sigurt, me një perspektivë të qartë evropiane si dhe me mekanizma gjithëpërfshirëse e të qëndrueshme për t’iu kundërvënë e për të luftuar edhe kërcënimet e reja të sigurisë”. “Ne besojmë fort se multilateralizmi efektiv dhe qasja gjithëpërfshirëse është mënyra e vetme për të sfiduar dhe kapërcyer çështje jashtëzakonisht të ndërlikuara që lidhen me mbajtjen dhe ruajtjen e paqes dhe sigurisë së bashkësisë ndërkombëtare”, – tha Meta duke shtuar se ne mbështesim fuqimisht vizionin dhe axhendën ambicioze të reformave të Sekretarit të Përgjithshëm për të reformuar tri shtyllat e sistemit të OKB-së.

“Shqipëria është një vend që ka mbështetur dhe vazhdon të mbështesë çdo përpjekje ndërkombëtare në të mirë të paqes dhe sigurisë globale. Për më tepër, vendi ynë ndjek dhe zbaton një politikë konstruktive rajonale, bazuar në parimet e marrëdhënieve të fqinjësisë së mirë dhe respektimin e të drejtave të pakicave”, nënvizoi Presidenti Meta.

“Që nga fillimi Shqipëria e përqafoi këtë organizatë të shquar në të gjithë botën si dhe u bë anëtare e saj në 1955. Shqipëria përqafoi dhe zbatoi parimet e OKB-së, që për shkak të Kartës së saj themeluese, u angazhuan për të ruajtur e për të zbatuar paqen dhe sigurinë ndërkombëtare, për të promovuar bashkëpunimin në zgjidhjen e problemeve sociale dhe ekonomike ndërkombëtare, si dhe për të punuar për barazinë dhe promovimin e të drejtave të njeriut. Shqipëria është një vend që ka mbështetur dhe vazhdon të mbështesë çdo përpjekje ndërkombëtare në të mirë të paqes dhe sigurisë globale. Për më tepër, vendi ynë ndjek dhe zbaton një politikë konstruktive rajonale, bazuar në parimet e marrëdhënieve të fqinjësisë së mirë dhe respektimin e të drejtave të pakicave”, deklaroi Meta.

“Kombet e Bashkuara, të lindura nga hiri i Luftës së Dytë Botërore, u krijuan për të shpëtuar brezat e ardhshëm nga murtaja e luftës, e cila dy herë, në gjysmën e parë të shekullit XX, i solli njerëzimit një trishtim të papërjetuar më parë. Teksa bashkësia ndërkombëtare ka qenë në gjendje të parandalojë shpërthime ushtarake të përmasave të mëdha që u panë gjatë shekullit të kaluar, të gjitha shtetet anëtare në këtë 75-vjetor të Kombeve të Bashkuara po përballen me një armik të ri dhe të padukshëm të përmasave globale. Pandemia COVID-19 e ka zhytur botën në një krizë të ashpër shëndetësore dhe ekonomike, e një lloji të tillë që nuk ishte parë prej gati një shekull. Gjithsesi, ndryshe nga përvojat e Luftërave Botërore, kësaj radhe jemi të tërë bashkë në një front, të gjithë duke luftuar kundër pandemisë globale të COVID-19. Me një udhëheqje të mirë politike dhe profesionale, me një solidariteti të madh, me një koordinim më të mirë si dhe një menaxhim të mençur, ne mundemi dhe do t’ia dalim mbanë me sukses”, – theksoi Meta.

Presidenti Meta u shpreh se “besojmë thellësisht se Kombet e Bashkuara, edhe 75 vite pas themelimit të tyre, mbeten ende gurthemeli i një bashkëpunimi shumëpalësh të bazuar në rregulla, nga i cili përfiton bashkësia globale si e tërë. Ne kemi nevojë për të trajtuar deficitin e besimit, si në gjirin e OKB-së ashtu edhe në një kontekst më të gjerë multilateral. Për shkak të këtij deficiti, vendet po e humbin besimin te institucionet shumëpalëshe, veçanërisht te OKB-ja. Konsensusi i arritur me Deklaratën Politike për përkujtimin e 75-vjetorit të Kombeve të Bashkuara është një shenjë e qartë e vullnetit tonë të mirë dhe aftësisë sonë për të punuar së bashku, që të rindërtojmë një ngrehinë arkitekturore multilaterale edhe më të fortë, më të përgjegjshme, më efikase dhe më të qëndrueshme”.

Kreu i shtetit tha se “konfliktet nuk do të zgjidhen dhe nuk do të kemi dot zhvillim të qëndrueshëm, pa pjesëmarrjen e barabartë dhe aktive në të gjitha nivelet të grave dhe të të rinjve. Për më tepër, të drejtat e njeriut nuk mund të respektohen kurrë plotësisht në se ato nuk gëzohen dhe mbulojnë gjithashtu të gjitha shtresat e shoqërive tona”.

Related Articles

Leave a Reply

Your email address will not be published. Required fields are marked *

Back to top button