Qeveritare

Bushati: Shqipëria, promovuese e të drejtave të njeriut

DITMIRI-KOFERENCA-21_41Editorial i Ministrit të Punëve të Jashtme, Ditmir Bushati

Vatrat e nxehta të konflikteve që kanë kapluar botën si Ukraina, Siria, Libia, Lindja e Mesme me luftën kundër ISIS janë dëshmi të pakundërshtueshme të rëndësisë parësore të të drejtave njeriut në ditët e sotme.

Shqipëria, si vend anëtar i NATO-s dhe kandidat i BE-së mbështet fuqimisht respektimin e të drejtave të njeriut dhe universalitetin e tyre. Bazuar në këto arritje, si dhe pas një fushate intensive diplomatike, më 21 tetor 2014, Shqipëria u zgjodh për herë të parë anëtare e Këshillit të të Drejtave të Njeriut, në zgjedhjet që u mbajtën në Asamblenë e Përgjithshme të OKB-së.

Anëtarësimi i Shqipërisë në Këshillin e të Drejtave të Njeriut është para së gjithash përgjegjësi para 193 vendeve anëtare të OKB-së, për besimin që na dhanë për të shërbyer në këtë organ të rëndësishëm, si dhe një shtysë për demokratizimin e mëtejshëm të shoqërisë tonë.

Në sistemin e Kombeve të Bashkuara, të drejtat e njeriut, së bashku me garantimin e paqes, sigurisë dhe zhvillimin e qëndrueshëm, përbëjnë tri shtylla thelbësore të ndërlidhura dhe përforcuese të njëra-tjetrës.

Përpjekja e parë e komunitetit ndërkombëtar në drejtim të mbrojtjes, respektimit dhe promovimit të të drejtave të njeriut mori jetë me krijimin e Komisionit për të Drejtat e Njeriut në 1946.

Por, në kontekstin e një bote gjithnjë e më shumë globale, u ndje nevoja për krijimin e një organi më me kredibilitet dhe aftësi për të vepruar. Për rrjedhojë, në qershor 2006, u krijua Këshilli për të Drejtat e Njeriut me një anëtarësi më të kufizuar (47 vende), i hapur vetëm për vendet me standarde të larta për të drejtat e njeriut. Që nga ajo kohë, Këshilli u shndërrua në një organ kyç të Kombeve të Bashkuara për adresimin e çështjeve të të drejtave të njeriut.

Shqipëria, që për gjysmëshekulli përjetoi një nga regjimet më të egra nga pikëpamja e dhunimit të të drejtave të njeriut dhe njëkohësisht një tranzicion sfilitës drejt shtet-ndërtimit demokratik, e njeh dhe çmon rëndësinë që ka respektimi i të drejtave të njeriut. Përvoja jonë e hidhur na motivon që sot, në mënyrë të pakushtëzuar, të mbështesim çdo iniciativë dhe çdo vend që përkrah dhe punon për avancimin e përmirësimin e të drejtave të njeriut.

Vendi ynë tashmë ka grumbulluar një përvojë veçanërisht të pasur në drejtim të nxitjes së paqes dhe sigurisë rajonale, të të drejtave të njeriut dhe zhvillimit ekonomik, në rrafshin e brendshëm dhe të jashtëm.

Falë pozitës gjeografike, trashëgimisë së pasur kulturore dhe shpirtit tolerant, Shqipëria është kthyer në një vend model dhe promotor të dialogut, respektit dhe vëllazërisë fetare. Vizita e para pak ditëve në Tiranë e Papa Françeskut dhe mesazhet e përcjella prej tij e përforcuan këtë avantazh krahasues të Shqipërisë në raport me vendet e tjera të rajonit.

Jam besimplot se anëtarësimi në Këshillin e të Drejtave të Njeriut është një mundësi tjetër që Shqipëria të demonstrojë kapacitetet dhe të përmirësojë shkallën e zbatimit të legjislacionit kombëtar dhe ndërkombëtar në drejtim të mbrojtjes, respektimit dhe promovimit të të drejtave të njeriut.

Ky anëtarësim është gjithashtu shprehje e arritjeve tona në fushën e lirisë dhe demokracisë, që thuajse një çerekshekulli më parë dukeshin të parealizueshme. Kjo na shton frymëzimin për të vijuar të palëkundur rrugën tonë euro-atlantike për ndërtimin e një shoqërie demokratike, si e vetmja alternativë për Shqipërinë dhe rajonin.

Related Articles

Leave a Reply

Your email address will not be published. Required fields are marked *

Back to top button