Kreditimi i ekonomisë u rrit me 12.7 % në korrik
Kreditimi i ekonomisë në muajin korrik 2021 u rrit me 12.7 % krahasuar me të njëjtën periudhë një vit më parë, bëri të ditur Banka e Shqipërisë.
Sipas BSH-së sistemi bankar disbursoi 24 miliardë lekë kredi të re gjatë muajit korrik, ku huadhënia dominoi në segmentin për individët.
Kreditimi i ekonomisë aktualisht është në trend në rritje krahasuar me një vit më parë. Sipas Bankës së Shqipërisë, në 7 muajt e parë të këtij viti sistemi bankar ka disbursuar rreth 133.6 miliardë lekë kredi, 11.1% më shumë krahasuar me të njëjtën periudhë të vitit të kaluar.
Banka e Shqipërisë vëren se kreditimi është adresuar kryesisht për qëllime afatgjata investimi, në pasuri të paluajtshme, por edhe për investime të tjera të biznesit në mallra kapitale, duke dhënë impakt të drejtpërdrejtë në rritjen e ekonomisë së vendit.
