Franca kundër Spanjës në finalen e Ligës së Kombeve të UEFA-s
Përfaqësuesja e Francës në futboll kaloi në finalet e Ligës së Kombeve të UEFA-s pasi mposhti Belgjikën 3:2 në një ndeshje fenomenale gjysmëfinale në Torino.
“Djajtë e Kuq” kaluan në epërsi me golin e Yannick Carrasco në minutën e 37-të, pas një depërtimi në zonën e rreptësisë së “trengjyrëshve” nga ana e majtë dhe gjuajti me saktësi milimetrike në këndin e poshtëm të portës së Hugo Lloris dhe topi përfundoi në portën e kampionëve aktualë të botës.
Katër minuta më vonë u bë 2:0, kur Romelu Lukaku i iku mbrojtjes dhe me një goditje të fuqishme tundi rrjetën e francezit. Lloris nuk arriti të mbrojë goditjen e fuqishme në kënd.
Në minutën e 62-të kur “gjelat” e ulën epërsinë në 1:2. Kylian Mbappe kaloi shkëlqyeshëm disa belgë dhe pasoi për Karim Benzema. Ai gjuajti nga një pozitë e vështirë i rrethuar nga lojtarët kundërshtar dhe tundi rrjetën e portierit Thibaut Courtouis.
Gjashtë minuta më vonë, pas një iniciative totale, arbitri akordoi penalti për Francën. Mbappe ishte i saktë, duke barazuar rezultatin në 2:2.
Në minutën e 90-të u përmbys rezultati. Francezët dominuan në pjesën e dytë të ndeshjes. Pas një aksioni të furishëm, Theo Hernandez me një goditje të fuqishme shënoi golin e tretë dhe të fitores për Francën.
Në ndeshjen e parë të gjysmëfinales, Spanja mundi Italinë me rezultatin 2:1 në Milano, kështu që ata do të luajnë kundër Francës në finalen e sezonit të dytë të Ligës së Kombeve të UEFA-s të dielën, më 10 tetor në orën 20:45 në “San Siro “.
Kampioni aktual i Evropës, Italia do të përballet me Belgjikën në ndeshjen për vendin e tretë në të njëjtën ditë në orën 15:00 në Torino.
Fituesi i sezonit të parë të Ligës së Kombeve UEFA-s ishte Portugalia në vitin 2019.
