Home / Kosova / Përfundon numërimi i votave në Kosovë, 21 komuna shkojnë në balotazh, ‘Vetëvendosja’ përballet me dy parti të mëdha më 14 nëntor

Përfundon numërimi i votave në Kosovë, 21 komuna shkojnë në balotazh, ‘Vetëvendosja’ përballet me dy parti të mëdha më 14 nëntor

Ka përfunduar procesi i numërimit të votave të rregullta të zgjedhjeve lokale të zhvilluara me 17 tetor.

Sipas rezultateve preliminare të shpallura nga Komisioni Qendror i Zgjedhjeve, në 17 komuna janë shënuar fitore të kandidatëve me mbi 50% të votave, ndërsa 21 komuna do të shkojnë në balotazh.

Bazuar në rezultatet preliminare të KQZ-së, PDK ka fituar katër komuna pa balotazh, Aleanca për AAK dhe LDK nga dy komuna, kurse Lëvizja Vetëvendosje nuk ka arritur fitore pa balotazh.

PDK ka fituar në Mitrovicë të Jugut, Ferizaj, Hani i Elezit dhe Skenderaj.

LDK ka fituar në Pejë dhe Lipjan.

AAK ka fituar në Deçan dhe Suharekë.

Ndërkaq, Lista Serbe ka fituar në Leposaviq, Mitrovicë të Veriut, Novobërdë, Shtërpcë, Zubin Potok, Zveçan, Graçanicë, Ranillug dhe Partesh.

Mirëpo përballja te shumica e komunave do të jetë në raundin e dytë, përfshirë edhe kryeqytetin.

LVV dhe LDK në balotazh do të përballen në pesë komuna: Prishtinë, Gjilan, Podujevë, Viti dhe Fushë Kosovë.

LVV dhe PDK në balotazh do të përballen në tri komuna: Prizren, Shtime dhe Kaçanik.

PDK dhe LDK në balotazh përballen në dy komuna: Vushtrri, Dragash.

LVV dhe AAK në Balotazh përballen në dy komuna: Gjakovë dhe Rahovec.

LDK dhe AAK përballen në balotazh në dy komuna: Istog dhe Junik.

PDK dhe AAK përballen në balotazh në Klinë.

Po ashtu në raundin e dytë do të ketë edhe disa përballje tjera:

Kamenica (Partia Socialdemokrate-LVV), Malisheva (Nisma-PDK), Mamusha (Partia Demokratike Turqve të Kosovës-KDTP dhe partia e Drejtësisë e Turqve të Kosovës-KATP), Gllogoci (PDK dhe Demokratët për Drenasin-DD), Kllokoti (Lista Serbe-Iniciativa qytetare Harmonia Popullore Serbe-GI SNS), Obiliqi (Iniciativa Qytetare për Obiliqin-IQO dhe LVV).

Raundi i dytë i zgjedhjeve lokale, do të mbahet më 14 nëntor.

Nderkohe Kryeministri i Kosovës, Albin Kurti nëpërmjet një statusi në “Facebook” ka reaguar pas përfundimit të numërimit të votave në 33 komuna në Kosovë. Ai ka bërë një krahasim të rezultateve me zgjedhjet e mbajtura vitet e mëparshme, ato parlamentare dhe lokale. Ai shprehet se në zgjedhjet lokale të zhvilluara më 17 tetor të këtij viti, Lëvizja Vetëvendosje është renditur e para. Kurti falënderon qytetarët për angazhimin e tyre, duke u shprehur se tashmë mbetet për të vijuar me raundin e dytë në 12 komuna më 14 nëntor 2021.

Statusi:

Në zgjedhjet parlamentare:

12 dhjetor 2010 – Lëvizja VETËVENDOSJE! e treta në nivel vendi

6 tetor 2019 – LVV e para

14 shkurt 2021 – LVV mbi 50%.

Në zgjedhjet lokale:

3 nëntor 2013 – LVV e katërta në nivel vendi

22 tetor 2017 – LVV e treat

17 tetor 2021 – LVV e para.

Ju falemnderit qytetarë të dashur. Vazhdojmë në raundin e dytë në 12 komuna më 14 nëntor 2021.

Leave a Reply

%d bloggers like this: