Prezantohen kandidatët për ambasadorë në Danimarkë e Rumani, Dade: Opozita të vijë në komision
Komisioni për Politikën e Jashtme zhvilloi sot seancë dëgjimore me dy kandidatë për ambasadorë, Kastriot Robo, në Mbretërinë e Danimarkës dhe Ilir Tepelena në Republikën e Rumanisë.
Kryetarja e komisionit, Arta Dade i bëri thirrje opozitës të marrë pjesë në komision gjatë seancave dëgjimore për ambasador, pasi shpeshherë ka ngritur shqetësimin për zbatim të ligjit “Për Shërbimin e Jashtëm”.
“Shpreh keqardhje që në të gjitha seancat për ambasador që ne kemi zhvilluar, opozita nuk ka qenë e pranishme. Në fakt ne do të kishim dëshirë të ishin të pranishëm sepse vazhdimisht kanë ngritur shqetësimin për zbatimin e ligjit “Për Shërbimin e Jashtëm” dhe realisht në të gjitha seancat që opozita nuk ka qenë e pranishme ne kemi zhvilluar seanca dëgjimore për kandidat për ambasador që vijnë vetëm nga shërbimi diplomatik, pra ne respekt të ligjit”, u shpreh Dade.
Gjatë prezantimit të dy kandidaturave, Sekretari i Përgjithshëm i Ministrisë së Punëve të Jashtme, Qirjako Qirko, theksoi karrierën e tyre të gjatë në fushën e diplomacisë.
Më tej, kandidati për ambasador në Danimarkë, Kastriot Robo paraqiti prioritetet e tij në këtë mision. Sipas tij, marrëdhëniet Shqiptaro-Daneze janë shumë të mira në të gjitha fushat, ndërsa theksoi mbështetjen që pala daneze i ka dhënë vendit tonë në procesin e anëtarësimit në NATO dhe integrimin në BE.
Kandidati Robo vuri ne dukje rritjen e shkëmbimeve ekonomike midis vendeve, si dhe mbështetjen që Danimarka ka dhënë për Kosovën dhe për institucionin e Avokatit te Popullit.
Ndërsa, kandidati për ambasador në Rumani, Ilir Tepelena, tha se në fokus të punës së tij do të jetë njohja e Kosovës. Sipas Tepelenës, parlamenti dhe qeveria rumune kanë mbajtur një qëndrim pozitiv në favor të njohjes së Kosovës, por kjo u kundërshtua nga presidenti Basesku . “Sfida ime do të jetë intensifikimi i marrëdhënieve dypalëshe, konsolidimi i dialogut politik”, u shpreh Tepelena.
Dy kandidaturat për ambasadorë theksuan gjithashtu se në marrëdhëniet mes Shqipërisë dhe vendeve ku ata pritet të emërohen do të përqendrohen edhe në bashkëpunimin ekonomik, politik, investimeve, arsim, turizëm, bujqësi, etj.
Anëtarët e Komisionit të Jashtëm shprehën mbështetjen e tyre për dy kandidaturat në fjalë.
