AAK e vendosur, nuk ndërron qëndrim për kryeministrin
Aleanca për Ardhmërinë e Kosovës ka mbajtur mbledhjen e kryesisë, ku është shprehur vendosmëria në zbatimin e marrëveshjes së 10 qershorit dhe kandidimit të Ramush Haradinajt për kryeministër.
Nënkryetari i AAK-së, Ahmet Isufi ka thënë se marrëveshja e 10 qershorit nuk mund të jetë peng i veprimeve të njëanshme të cilit do subjekt që është pjesë e koalicionit.
“Për më shumë në atë rast përgjegjësia e parë për dështimin eventual të marrëveshjes së 10 qershorit bie mbi atë subjekt politik dhe udhëheqësin e tij”, ka thënë ai.
Më tutje, Isufi shtoi se politika dhe shoqëria kosovare kërkon ndryshime rrënjësore dhe lidership të ri në Qeverinë e Kosovës, në krye me Ramush Haradinaj.
Ramush Haradinaj mbledh partinë
Kryesia dhe kryetaret e degëve të AAK-së sapo kanë filluar një mbledhje në selinë e kësaj partie ku pritet të diskutohet për zhvillimet e fundit politike.
“Pika e kësaj mbledhje do të jetë zhvillimet e fundit në vend dhe institucionet”, tha shkurt kreu i AAK-së, Ramush Haradinaj.
Marrëveshja mes bllokut LDK-VV-AAK-NISMA ka filluar të lëkundet derisa po shqyrtohet posti i kryeministrit nga LDK dhe AAK.
Përfaqësuesit e bllokut të premten patën një takim në orët e vona.
Kreu i AAK-së, Ramush Haradinaj pas këtij takimi pati thënë se derisa nuk ka marrëveshje të re dhe mbetet në fuqi marrëveshja e 10 qershorit, raporton kallxo.com.
Por fundjava ka treguar më shumë se asnjëherë brishtësinë e kësaj marrëveshjeje pasi zyrtarë të të dyja partive kanë polemizuar në distancë rreth kandidatit për postin e kryeministrit.
