Rama: Asgjë nuk e ndal operacionin kundër vjedhjes masive të energjisë
Kryeministri Edi Rama ka reaguar sot sërish ndaj atyre që thonë që s’kemi lek të paguajmë energjinë.
Nëpërmjet një postimi në rrjetin social “Facebook”, Rama shkruan se, 98% e pensionistëve e paguajnë ! 93% e personave me aftësi të kufizuar, invalidë, paraplegjikë e tetraplegjikë e paguajnë.
“Edhe njëherë për cilindo këtu që thotë s’kemi lek të paguajmë energjinë:”, shkruan Rama. “98% e pensionistëve e paguajnë! 93% e personave me aftësi të kufizuar, invalidë, paraplegjikë e tetraplegjikë e paguajnë! Kush është më i dobët se këta le të flasë, po më të dobët se këta nuk ka dhe krim kush e vjedh pa e paguar e turp kush thotë si ta paguaj kur nuk është as pensionist e as invalid!”, shkruan kryeministri Rama.
Asgjë, vijon Rama, “nuk e ndal operacionin kundër vjedhjes masive dhe hajdutëve të paskrupullt të energjisë, të cilët të gjithë së bashku i grabisin këtij vendi çdo vit aq sa shteti paguan në vit për gjithë kujdesin social; aq sa kushtojnë 100 km rrugë kombëtare; aq sa kushtojnë 150 shkolla të standarteve europiane; aq sa kushtojnë 6 spitale rajonale; aq sa paguajnë për shtetin të gjitha kompanitë!”.
Jo, thekson Kryeministri Rama, “s’ka asnjë rrugë tjetër për të bërë Shqipërinë shtetin e denjë të shqiptarëve! Secili të marrë përsipër pjesën e vet dhe të gjjthë të bashkuar ta kuptojme se të respektosh ligjin dhe të paguash detyrimet e tua është patriotizëm, ndërsa të vjedhësh është krim që dënohet me ligj e të jetosh në kurriz të shoqërisë është parazitizëm që nuk mund të tolerohet më tutje”.
