Ministrat e Jashtëm të Shqipërisë, Italisë dhe Serbisë takim në 23 janar në Romë
Më 23 janar ministrat e Punëve të Jashtme të Shqipërisë, Italisë dhe Serbisë do të takohen në Romë për të marrë pjesë në takimin trepalësh, të organizuar nga ministri italian Paolo Gentiloni.
Burime nga Ministria e Punëve të Jashtme konfirmuan për ATSH-në se në këtë takim Shqipëria do të përfaqësohet nga ministri Ditmir Bushati.
Ky takim zhvillohet në funksion të stabilitetit në rajonin e Ballkanit dhe është propozuar në korrik të 2014 nga ish-ministrja Federica Mogherini gjatë vizitës që zhvilloi në Tiranë.
Gjatë konferencës së përbashkët me homologun e saj në Tiranë, Mogherini deklaroi se ky takim do të kishte për qëllim nisjen e një dialogu trepalësh midis Italisë, Shqipërisë dhe Serbisë për të kontribuar më tej në rritjen e stabilitetit në rajon.
