‘Xibraka’, sasia e kokainës mund të rritet. Ekspertiza për dy sasi të tjera pluhuri në laborator

Organi i akuzës është në pritje të përfundimit të analizave për lëndët e sekuestruara në laboratorin e kokainës në Xibrakë të Elbasanit.

“Panorama” shkruan sot se dyshohet se në solucionet e sekuestruara aty, si dhe në sasinë e madhe të përzierësit, ka sasi të tjera kokaine, veç lëndës narkotike që është sekuestruar.

Prokuroria dhe Policia në deklaratat e tyre kanë thënë se gjatë aksionit është sekuestruar 19 kilogramë e 416.2 gramë lëndë narkotike kokainë, ndërsa po ekspertohen edhe dy sasi të tjera lënde të dyshuar. Bëhet fjalë për 77.727 kilogramë lëndë narkotike e dyshuar se është e llojit kokainë, por edhe një sasi tjetër prej 19.8 kilogramë pluhur, e dyshuar si përzierës i lëndës narkotike kokainë.

Sipas burimeve nga organi i akuzës, dyshohet se në përfundim të analizave sasia e drogës së bllokuar mund të rritet.