Libri

Librat e rinj

Geraldine Brooks

Misteri i Hagadasë së Sarajevës

Përktheu: Adrian Belo

Botimet: Bota shqiptare

Çmimi 1250 lekë

misteriViti 1996. Kur Hana, një australiane e re, mirëmbajtëse e pasionuar dorëshkrimesh të vjetra, mëson se kërkohet t’i besohet asaj Hagadaja me emër e Sarajevës, ndien se bëhet fjalë për shansin e jetës së saj. Gjer aty pat qenë ndier më mirë në shoqërinë e librave se të bashkëkohësve të saj. Merr udhën, pra, drejt dorëshkrimit të rrallë hebre, i shfaqur sërishmi në Ballkanin gërmadhë. Nga një shenjë e vockël në tjetrën, Hana do të ndriçojë pak nga pak të fshehtat e njerëzve që kanë mbajtur në duart e tyre dorëshkrimin e shenjtë. Nga ithtarja e re e Kabbalës, që e shpëton librin nga Inkuizicioni spanjoll, e gjer tek intelektuali mysliman që e merr në gji nën hundën e nazistëve, por duke kaluar më herët nëpër duart e censorit venedikas që nuk e dërgon në turrën e druve, kjo është odiseja e paepur e Hagadasë, e cila i prin Hanës nga zhgënjime në zbulime, nga rindërtime rrethanash në dashuri të trishtë, në gjurmët e vetë historisë së saj…

Emanuele Trevi

Diçka e shkruar

Përktheu: Agim Doksani

Botimet: Dudaj

Çmimi: 800 lekë

Romë, fillimi i viteve ’90. Ndërsa ëndrrat e shekullit XX po i afrohen një fundi të pashmangshëm dhe Berluskoni përgatitet të marrë pushtetin, një shkrimtar tridhjetëvjeçar cinik dhe naiv, i shkujdesur dhe njëherësh i përthelluar, gjen punë në një arkiv, Fondi ‘Pier Paolo Pasolini’. Në atë labirint letrash të mbyllura në një pallat të madh në lagjen ‘Prati’ mbretëron Laura Betti, një noprane e madhe që po i perëndon ylli: por takimi me heroinën e çartur të këtij libri, e vetëquajtur e megjithatë trashëgimtare e mirëfilltë shpirtërore e poetit friulan, për djaloshin ka vlerën e një takimi të vërtetë me Pasolini-n, njëlloj sikur autorja e Teoremës të ishte ngjizur, të ishte pushtuar nga prania e tij e gjallë, nga itinerari privat prej eksperimentuesi të zjarrtë seksual dhe nga ndodhia e tij publike e artit, herezisë dhe provokimit.

Luca Filippi

Labirinti i fshehtë

Përktheu: Virgjil Kule

Botimet: Ombra GVG

Viti i Zotit 1503. Në kështjellën e Goricias, një tregtar venecian u gjet i mbytur në dhomën e vet. Gastaldi i Goricias kërkon të hedhë dritë mbi krimin dhe ngarkon me detyrën e hetimit Tiberio di Castro, një farmacist roman në syrgjyn, i shoqëruar nga Izabela, bija e bukur dhe inteligjente e viktimës, si dhe nga një murg misterioz. Tiberio nis një rrugëtim të vështirë që do ta çojë në gjurmët e një qytetërimi të lashtë. Për të vënë në vend drejtësinë si dhe për të riparuar dorëshkrimin e çmuar, farmacistit do t’i duhet të përballet me dyndjet e turqve, si dhe të përgënjeshtrojë demonë të pavërtetë, në një udhëtim aventurier përgjatë brigjeve të Istrias deri në Republikën e Venecias.
Ndërkohë në Romë vdes Papa Aleksandri VI i urryer…
Herman Melville

Mobi Dik

Përktheu: Rudi Erebara

Botimet: Zenit

Herman Melville (1 gusht 1819 – 28 shtator 1891), ndër shkrimtarët më të mëdhenj të letërsisë së gjithë kohëve dhe perkursor i prozës amerikane. Kryevepra e tij “Mobi Dik” u botua për herë të parë në Mbretërinë e Bashkuar dhe më pas në vendin e tij, SHBA, dhe për shumë vite mbeti e papikasur prej kritikës, e cila, sot e vendos atë unanimisht në romanet më të epërm të letërsisë botërore, duke e cilësuar si eposi homerik modern. Vepra të tjera të rëndësishme të tij janë: Bartleby shkruesi, Omoo, Billi Bad marinari, Xhaketa e bardhë, Mardi etj.

Related Articles

Leave a Reply

Your email address will not be published. Required fields are marked *

Back to top button