Kronika

Baraybar: Basha, me mua në Kukës

Mjeku ligjor peruan, Jose Pablo Baraybar, i cili ka qenë disa herë në Shqipëri vitet e shkuara për të hetuar lidhur me akuzat e Dick Marty, në një intervistë telefonike për Top Channel shprehet se ka analizuar dyshimet në Burrel dhe në Kukes.

Zoti Baraybar tha se kishte hetuar për llogari të OKB-së, por mbështet dyshimet edhe pse pranon se nuk ka gjetur asnjë provë. I pyetur lidhur me deklaratat se ka patur përkthyes në atë kohë ministrin aktual të Brendshëm, Lulëzim Basha, zoti Baraybar u shpreh se zoti Basha ka qenë bashkë me të në Kukës si zyrtar i UNMIK-ut. 

TCH: Keni thënë se keni hyrë disa herë në Shqipëri, për të investiguar dyshimet që përmenden nga Carla del Ponte dhe së fundi nga reporteri i Këshillit të Europës, Dick Marty. Keni gjetur prova?

Baraybar: Epo, e gjitha varet nga cfarë quani prova, sepse ne thamë dhe mendoj se Dick Marty e raportoi mjaft qartë, se cfardo që u gjet në të ashtuquajturën shtëpi e verdhe, që në fakt ishte e bardhë jo e verdhë kur ne e vizituam, ishte dicka paraprake, por jo përcaktuese. Do të thoja se vetë shtëpia e verdhë nuk ishte i vetmi burim, apo mjet i fillimit të hetimit, që është pjesë e një kompleksiteti gjërash. 

THC: Mendoni se ka dhe te tjera vende si ajo?

Baraybar: Sipas raportit, është edhe një tjetër vend i tillë, në Fushë-Krujë të Tiranës. Këtë dëgjova dhe unë pak a shumë në të njëjtën kohë kur mora informacione mbi shtëpinë e verdhë, por unë vetë nuk kam qenë atje dhe nuk e di, nuk e kam idenë se ku është kjo shtëpi në Fushë-Krujë.

TCH: Përse keni hyrë në Shqipëri në mënyrë të fshehtë dhe për llogari të kujt keni hetuar dhe analizuar për këto dyshime?

Baraybar: Nuk kam hyrë ndonjëherë fshehurazi në Shqipëri, gjithmonë kam mbërritur zyrtartisht në Shqipëri. Dua të them se nuk është se jam përvjedhur maleve apo dicka e tillë. Në dy herët që kam qenë, i pari ishte, le të themi një udhëtim turistik, dhe i dyti ishte për një hetim zyrtar me aty edhe një prokuror shqiptar gjithashtu. Pra, fshehtaz s’kam qenë ndonjëherë.

TCH: Përderisa nuk ka prova apo dëshmi reale, përse duhet të debatohet pas 11 vitesh një cështje e tillë, e ngritur mbi dyshime? Mos mendoni se po interpretohet politikisht në një rrethanë dhe kontekst të caktuar?

Baraybar: Kjo është një pyetje shumë e mirë, por që nuk duhet të më drejtohet mua, por të tjerëve sepse edhe unë të njëjtën pyetje i kam bërë vetes. Dua të them se ka dy lloje akuzash këtu dhe është shumë e rëndësishme t’i vecojmë ato nga njëra-tjetra. E para që janë cuar njerëz nga Kosova në Shqipëri, në kampet e UCK-së në territor shqiptar dhe ky është një fakt që është demonstruar shumë kohë më parë. S’ka asgjë të re këtu dhe që tamam-tamam s’ka të bëjë fare me organet njerëzore, por me faktin që UCK-ja kishte baza edhe në Shqipëri, e më saktë në Kukës. Në 2003-shin, kur kam qenë aty për herë të parë, arrita të shoh një prej këtyre kampeve në Kukes, kam intervistuar njerëz që ishin dërguar atje, por nuk po them se këtyre njerëzve u ishin hequr organet. Cështja e dytë eshte një set i dytë informacioni që ka të bëjë me rrjetin e trafikimit të organeve dhe kjo është dicka tjetër, e shkëputur, pikërisht këtu hyn në skenë edhe shtëpia e verdhë. Dua të them, përse askush nuk hetoi për këtë? Besoj se Marty raportoi saktë kur tha se komuniteti ndërkombëtar nuk deshi të ndërhynte e të trazonte atë të ashtuquajtur stabilitet të Kosovës, në kohën kur ish-lideri i UCK-së ka marrë tani një pozitë politike. 

TCH: Përse nuk keni folur deri tani, por e bëtë këtë pikërisht këto ditë?

Baraybar: Nuk kam folur për këtë deri tani, sepse nuk jam më pjesë e OKB-së, nuk punoj më në Ballkan dhe tani u raihap si cështje vetëm nga raporti i Marty dhe nga asgjë tjetër. 

THC: Keni thënë që kishit si përkthyes ministrin aktual të brendshëm të Shqipërisë, Lulzim Basha. I qendroni këtij pohimi edhe sot?

Baraybar: Këtë nuk e kam thënë asnjëherë. Lulzim Basha nuk ka qenë me mua në shtëpinë e verdhë. Ai ka qenë sidoqoftë me mua gjatë vizitës së pranverës 2003 në Kukës. Lulzim Basha punonte për UNMIK-un. Kur unë kam qenë atje, ai punonte aty, në 2002-shin ka qenë aty, në Departamentin e Drejtësisë dhe pranëverën e 2003-shit erdhi me mua dhe me dikë tjetër në Shqiperi. Ai nuk ishte përkthyesi im, ai punonte për Departamentitn e Drejtësisë. S’e kam thënë kurre që ai ishte përkthyesi im. Ai erdhi me ne në atë ndalesë në zonën e Kukësit, kjo po është e vërtetë.

Related Articles

Leave a Reply

Your email address will not be published. Required fields are marked *

Back to top button