Ekspozita

Gjirokastër, zbulohen fragmente të një kalldrëmi të vjetër

 Fragmente të një kalldrëmi të vjetër janë zbuluar gjatë punimeve restauruese të kryera para disa kohësh në disa objekte të Qendrës Historike të Gjirokastrës. Pjesët e kalldrëmit të vjetër ndodhet rreth 1,5m nën nivelin e kalldrëmit ekzistues. Materiali i përdorur për ndërtimin e këtij kalldremi është gur i zi në formë dhe përmasa jo të rregullta në krahasim me gurët e kalldrëmit ekzistues të rrugëve të qytetit të Gjirokastrës. 

Ky fakt, sipas specialistëve të monumenteve të kulturës në Gjirokastër, tregon se ky kalldrëm ka funksionuar në një periudhë tjetër kohore . Gjithashtu, pozicioni i kalldrëmit të zbuluar është më në thellësi jo vetem me kalldremet aktuale të Gjirokastrës , por edhe me ndërtesat historike ekzistuese.

Arkeologu Vladimir Qirjaqi ka thënë për atsh-në se pozicioni i kalldrëmeve të zbuluar të bën të mendosh për një nivel tjetër funksional që Pazari i Gjirokastrës ka pasur shumë e shumë vite më parë. Sipas studimeve të kryera vitet e fundit nga specialistët italianë të Rajonit të Markeve dhe specialistët e Drejtorisë së Monumenteve, kanë rezultuar ambjente të nëndheshme (nën nivelin e sotëm të rrugës) në shumë objekte të Pazarit të Gjirokastrës që padyshim të bëjnë të mendosh për një fazë shumë më të hershme të funksionimit të këtij Pazari mbi të cilën do të hidhet më shume dritë në të ardhmen.

Related Articles

Leave a Reply

Your email address will not be published. Required fields are marked *

Back to top button