Mustafa: Programi qeverisës gjatë javës në Kuvend

Kryeministri , Isa Mustafa, ka thënë se gjatë kësaj jave, pasi të jetë përgatitur edhe teknikisht, programi qeverisës që e prezantoi javën që shkoi do të shkojë në Kuvendin e Kosovës, për njoftim.

Njoftimin për prezantimin e programit qeveritar e ka bërë vetë kryeministri në profilin e tij në Facebook, pasi ka treguar se gjatë ditës ka pasur takim me biznese me Odën Gjermane – Kosovare të Biznesit, si dhe me Lëvizjen FOL.

“Sot kisha një takim shumë të dobishëm me Odën Gjermane-Kosovare të Biznesit, në të cilën trajtuam Programin Qeverisës. Po ashtu shumë nga elementet e Programit, i prezantova edhe para mediave në një takim të organizuar nga OJQ Fol”, ka shkruar Mustafa në Facebook.

“Qeveria e ka aprovuar Programin javën e kaluar, ndërkaq gjatë kësaj jave, pasi të jetë përgatitur teknikisht, do t’i përcillet Kuvendit të Republikës së Kosovës për njoftim. Së bashku me Programin Qeverisës është përgatitur edhe Plani i implementimit, i cili do t’u shërbej Kryeministrit dhe ministrive për të matë dhe kontrolluar performansën gjatë implementimit. Programi do të jetë publik për të gjithë të interesuarit”, ka shkruar ai.