Kenia bombardon bazat e al-Shababit në Somali

Forcat ajrore keniane kanë bombarduar pozicionet e grupit islamik al-Shabab në Somalinë fqinje, duke u fokusuar më së shumti në dy kampet e tyre në rajonin e Gedos, të përdorura rëndom nga militantët për të kaluar në Kenia.

Ky është i pari reagim ushtarak ndaj masakrës së javës që shkoi në Universitetin e Garisës, episodi i përgjakshëm që tronditi mbarë botën vetëm pak ditë përpara njërës prej festave më të rëndësishme të shënuara të kalendarit katolik, Pashkëve.

Të dhënat e fundit tregojnë se në mesin e agresorëve ishte edhe i biri i një zyrtari të lartë qeveritar. Zëdhënësi i Ministrisë së Brendshme sqaroi se Adbi-Rahim Abdullahi ka qenë njëri nga katër personat e armatosur që mësynë kolegjin universitar e vranë 150 të rinj, shumica të krishterë. Zyrtari në fjalë duket se e kishte njoftuar më parë zhdukjen e të birit. Megjithatë, kjo formë distancimi e tij nuk mjafton për të fashitur zemërimin e banorëve të Garisës, të cilët janë të bindur se qeveria mund ta kishte parandaluar gjakderdhjen dhe dështoi ta bënte një gjë të tillë.

“Gjendja e sigurisë është shumë e keqe. Për ne, faji është i gjithi i qeverisë sepse nuk po bën ndonjë gjë në këtë drejtim”, thotë një banor i zonës.

Edhe pse shefi i sigurisë së Kenias e mbrojti me forcë reagimin e forcave speciale ndaj sulmit, agjencia franceze e lajmeve AFP njoftoi se u deshën të paktën shtatë orë që efektivët të shkelnin në vendin e ngjarjes, ku gazetarët kishin mbërritur përpara tyre. Masakra e militantëve somalezë të al-Shabaabit ndaj studentëve kenianë shkaktoi  hidhërim dhe tronditje në mbarë globin.

Por, terrori me sa duket nuk ka marrë fund, pasi ekstremistët islamikë paralajmërojnë për akte të tjera dhune.