Ligji i spostimit dhe shpërthimi
Ahmet Dursun
Ligji i vetëm që funksionon në drejtësinë e pluralizmit shqiptar, është ai i pashkruari: ligji i spostimit.
Çdo vendim i kësaj drejtësie, domosdo bazohet mbi këtë ligj dhe përfundimi është:
Përdhunuesi shpallet i pafajshëm, pasi viktima ish spostuar në një pozicion të gabuar.
Trungjet spostohen dhe bëhen mobilie; sharra shpallet heroinë.
Gërryhen shtretërit, lumenjtë spostohen dhe firma ndërtimi ngrenë pallate.
Spostues, – u thërrasin këtu, veçse kur kapen matanë quhen trafikantë droge.
Vrasjet për ta janë thjesht spostim nga kjo jetë e mërzitshme, në parajsën e pafundme.
Grabitja trajtohet si spostimi i pasurisë tënde në duart e të tjerëve.
Vota mjaft të numërohet thonë, se u spostua nga një parti te tjetra s’ka asnjë të keqe…
***
Me ligjin e spostimit të këtyre gjyqtarëve, u spostua ideali. Ai, i shtetit të së drejtës, atdheu, përkatësia …
Nderi, guximi, ndërgjegjja… vëmendja!
Me këtë ligj të pashkruar, çdo ditë e më tepër po spostohet për diku tjetër shpresa, ëndrra, e ardhmja!
***
Dhe ti ende habitesh lexues i dashur…
Nuk e pe?! Ta tregoi edhe vetë toka në Marinëz, ta tregoi bardhezi.
Shpërtheu, kundër vendimeve të gjykatave.
Ndryshe nga ty, edhe nëntokës iu sos durimi!
Ndryshe prej teje, i tha mjaft nguljes së tubit vertikal, që mandej spostohet horizontalisht deri në qendër të fshatit…
Reagoi toka në Marinëz dhe si për të ta treguar ty, shpërtheu në formën e dy gishtave…
Dy gishtat, që të spostuan në vrimën e fundit të kavallës gjithë këto vite.
Shpërthe, plas, bëhu copa po të duash tashmë!
Nuk është faji i të huajve që ti ende u beson gjyqtarëve të plepave.
E vërteta është se sot, si një mushkonjë mbi kurriz të elefantit përfundove!
Mbete i spostuar si individ, shoqëri e si shtet plot 24 vite për shkak të këtyre gjyqtarëve…
